DILI-Ohin loron Timor Leste luta maka’as atu adere ba  Asosiasaun Nasaun Sudeste Azia nian (ASEAN) iha tinan 2015. Razaun ida mak haree ba jeografiku nian TL nakfati iha Azia Sudeste. Maibe haree ba kestaun ekonomia nian, Timor-Leste bele nabeen tanba laiha kbiit atu halo kompetisaun ho membru ASEAN sira seluk.

Peskizador Lao Hamutuk Juvinal Dias  bainhira sai hanesan orador ba diskusaun loron trballador ne’ebe organiza husi  Forum Traballador Maubere (FORAM) iha loron 1 Maiu semana liuba iha Jardin Borja da Costa hatete, Estadu TL seidauk prepara didiak atu lori nasaun ne’e tama ba membru ASEAN. Nia kestiona konaba preparasaun ne’e tanba hare husi vantajen no desvantazen no ekonomia nasaun ne’e nian sei naben.

Nia dehan iha ASEAN iha akordu merkadu livre ne’ebe ho lian Ingles free trade agreement katak nasaun sira ne’ebe sai ona membru ASEAN  tenki kesi metin ho akordu sira ne’ebé iha ona. Iha parte ida, TL seidauk produs sasan iha rasi laran rasik. Durante ne’e sasan barak liu importa husi rai liur. Ida ne’e sai problema boot ba TL bainhira ASEAN implementa komersiu livre. “Sasan ne’ebe ita bele produs maka sasan ne’ebe iha tiha ona standar hak pakai. Agrikultor ka produtor rai laran labele produs sasan ne’ebe organizasaun merkadu internasional seidauk rekoñese ,” dehan nia.

“Ita-boot sira fa’an produtu kafe ka produsaun buat balun tenki iha standar kesehatan se laiha standar saude ne’ebe ASEAN simu ita nia sasan ne’ebe ita kuda iha to’os sei la iha valor iha merkadu ASEAN nian,” nia aumenta. Buat ida fali akordu agrikultura nian katak nasaun sira obriga ita atu produs sasan ba orientasaun merkadu la’os ba konsumu merkadu nian. Buat seluk fali obriga ita atu sosa sira nia produtu duke produs ita nian, bazikamente ASEAN obriga ita atu sosa sira nia produtu duke produs ita nian rasik.

“Bazikamente ASEAN obriga ita atu  sai nasaun konsumidor duke produtor, risku boot ida ba Timor, ita agora ne’e konsume hela sasan hotu-hotu husi nasaun seluk.”  Buat seluk tenki konsidera katak sasan sira ne’ebe hatama husi rai liur ita la fo sira selu taxa no fo livre tama, impaktu ba ekonomia rai laran, estadu labele hetan osan, rendnimentu menus nia labele fo servisu ba povu sira iha ne’e. Iha ASEAN bolu Zona Investimentu ASEAN  ne’e akordu ida katak nasaun hanesan TL iha obrigasaun atu loke investimentu ba kualker investimentu tomak, problema hanesan ne’e ita sei hamate ita nia ekonomia rai laran no Camara Comersiu Indutria CCI-TL sei mate.

“Se tama ASEAN ekonomia lokal sei hancur, Xina nia ekonomia mak sei dumina ita, Indonesia nia ekonomia mak dumina ita,” dehan nia. Estadu TL seidauk halo assessment klean ba servisu ne’ebe atu loke, iha futuru Indonesia oan sira mak sei domina servisu no India sira mak sei tama mai. “Ita iha risku labele hare deit ASEAN ne’e livre tanba bele hetan visa gratis,” nia fo hanoin. Nia husu estadu atu prepara an la’os dehan atu adera ba ASEAN iha tinan 2015 maibe tenki dezenvolve setor edukasaun, saude, no hasae skil trballador sira.

Estadu labele halimar ho ASEAN estadu iha obrigasaun politik no responsavel legal no moral atu dezenvolve rekursu umanu rai laran. Enterantu Presidente Camara Comersiu Industria Timor Leste  Julio Alfaro hatete to’o ohin loron Timor Leste seidauk preparadu diak atu tama ba ASEAN tanba estadu seidauk kria politika ida atu fo apoiu ba mikro no pekenas empreza. “Husi hau nia perspetiva ita seidauk preparadu atu tama ba ASEAN tanba ne’e husu ba estadu katak molok atu tama ba ASEAN tenki prepara an uluk antes atu tama,” dehan Julio.

Nia fo ezemplu uluk Portugal nasaun ne’ebe moris no ukun an tinan 800 resin ona uluk sira mesak, sira moris ladun diak maibe sira moris. Kuandu sira tama tiha iha Komunidade Europeia hanesan mos ASEAN ba ita, sira tanba nasaun fraku iha komunidade Europeia ema hotu bele tama no ema hotu bele halo saida mak sira hakarak  no investimentu ne’ebe halo iha ne’eba iha buat barak  no estadu Portugal la iha osan no nia tenki ba deve iha liur. Ohin loron krizi iha Portugal krizi boot tanba osan ne’ebe deve labele selu no ema sira ne’ebe fo osan ba sira agora sira mak manda iha Portugal.

Preparasaun tama ba ASEAN prekupasaun politika ne’ebe ita tenki halao mak parseira estadu ho setor privadu liu husi CCI-TL tenki halao no tenki kria politika ida atu fo apoiu ba dezenvolvimentu mikro no pekenas empreza koperativa ho setor informal iha Timor atu nune bele hasae liutan sira nia produtiva. Ne’e hotu  responsavilidade estadu nian atu haree. Sekretariu Estadu Asuntu ASEAN Roberto Sarmento de Oliveira Soares ne’ebe sai mos hanesan orador iha diskusaun ne’e  hateten  razaun fundamental TL  tama ba ASEAN sai tiha ona hanesan objetivu prinsipal iha politika eksterna TL nian. “Mehi ka objetivu ida ne’e mosu tiha ona iha momentu ita luta atu afirma ita nian an nudar hanesan nasaun foun iha rejiaun Sudeste Aziatiku ninian.

Ita nia funador sira dehan bainhira ita atinji ita nia ukun rasik an, faze segundu ne’ebe ita atu atinji mak asegura edentidade rejional atu bele tur hamutuk ho pais sira saudeste aziatiku nian tur hanesan la iha ema ida mak aas liu. ASEAN hari iha loron 8 fulan agostu 1967 ne’eba hari  husi nasaun lima hanesan Indonesia , Malaysia, Filipina  Singapura no Tailandia. Ligasaun ba istoria TL nia  ho ASEAN iha nakukun nia laran  maibe iha prosesu atu tama ba ASEAN ita hadutu politika foun iha era globalizasaun foun nian. (Business Timor)