DILI-Traballador  timoroan hamutuk ema na’in 20  sei aranka  bá  Darwin  Australia, parte Norte Teritoriu  semana oin  mai bá serbisu  iha to’os hortikultura ku’u pateka. Diretór Empregu  Nasionál SEPFOPE Paul Alves bá  BT  iha nia  kna’ar-fatin Obrigado Barrack, Tersa(29/04) semana liu-bá hatete loloos ne’e traballador sira ne’e aranka iha  loron 1 Maiu  tanbá razaun  kompañia husi Australia  ne’ebé traballador sira  husu bá SEPFOPE  atu hadia  tan  vistu ne’ebé mak  foin tama. Tanbá ne’e mak traballador sira  sei aranka  iha loron 13  fulan ne’e.

Paul haktuir traballador  na’in 20  ne’e  serbisu  iha kompañia Konektu. Traballador sira  ne’e  feto 4 no mane 16. Iha tinan  ne’e númeru  ne’ebé boot  iha  area hortikultura. “Númeru traballador ne’ebé mak  boot  ita  haruka  traballador sira bá serbisu iha Australia kompara ho tinan  kotuk, númeru traballador ne’ebé mak serbisu iha Australia bá area agrikultura  hamutuk ema 32 no iha  area hospitalidade  ema  hamutuk 45 ho durasaun serbisu fulan neen.    

Alende  ne’e  Paul esplika mós kona-bá númeru formador ne’ebé tuir formasaun iha  sentru formasaun tolu refere. Formandu balu hetan ona serbisu  iha area insfrasturtura. Agora SEPFOPE estabelese ona departamentu merkadu serbisu. Formandu barak mak serbisu ona maibé  númeru  formandu ne’ebé hetan ona serbisu la hatene na’in hira no hetan ona serbisu iha  fatin ne’ebé. Iha  fatin hanesan Embaxador  Australia  iha  Timor-leste Peter Doyle  iha  seremonia despedida ho traballador 20  iha salaun inkontru SEPFOPE hatete programa  ne’e iha benefisiu boot bá partisipante timoroan sira no mós emprezaria Australia.

Programa ne’e mós  ezemplu di’ak ida husi serbisu oioin  ne’ebé Governu Timor-Leste no Australia halo hamutuk programa ne’e  ezemplu barak  no atividade ne’ebé hatudu amizade ne’ebé  metin no forte entre nasaun  rua. Nia  haktuir Timor-Leste no Northern Territory  Australia mós iha ligasaun  metin  no klean. “Ami senti kantenti  atu halo despedida ho traballador sira bá ekipa traballador  ne’ebé premeira ves sei halo serbisu iha Australia Northern Territory. Tuir nia programa  ne’e fó kontribuisaun bá dezenvolvimentu ekonomia iha Timor-Leste  liu husi formasaun  no rendimentu ho partisipante sira no fó oportunidade hodi haruka osan bá sira nia familia.

Peter  hatete importante mós bá programa ne’e responde bá nesesidade ho oportunidade ba merkadu traballu iha Australia ne’ebé akontese tanbá iha variasaun tempu ba tempu no programa ne’e mós fó empregador sira  konfiansa kona-bá fornesimentu traballador. Liu husi formasaun iha serbisu fatin partisipante sira mós bele aprende lian ingles, asesu bá formasaun primeiru sokuru no komputador iha Australia. ”Hau  hein katak, partisipante sira viajen di’ak iha sira nia esperensia iha Australia,” dehan Peter. Peter  esplika traballador 80 mak  hola parte ona iha programa WSP ne’ebé dezeñu ho maneira atu traballador sira  bele fila-fali bá Australia  iha tempu tuir mai. Informasaun ne’ebé hetan husi emprezariu  Australia  kona-bá traballador uluk  ne’e mesak positivu hotu.

Partisipante sira ne’ebé  serbisu uluk iha fatin oioin hanesan, iha Australia Broome iha Norte-Oeste Australia, area rurais  iha Victoria no New South Wales, ilha Hamilton iha Queesland, no mós agora iha Northern Territory. Alende  ne’e  xefe grupu  ekipa  traballador  Australia, Delfina  Rangel  hatete, senti kontente  ho oportunidade ne’ebé SEPFOPE  oferese maske  hasoru difikuldade oioin  bá serbisu iha  ne’ebá. Mmaske serbisu ne’ebé todan maibé  ho esforsu no kontente  bá serbisu iha  ne’ebá. “Bainhira hau  fila  hau sei halo  buat  ruma ne’ebé di’ak  bá  hau nia  familia no mós ita nia  nasaun  no fahe  mós  esperensia  serbisu ne’ebé mak ami halo durante fulan neen iha Australia,” nia hameno. (Business Timor)