DÍLI----Federasaun Tenis De Timor-Leste (FETTIL) Realiza Kompetisaun Tenis Nasionál hodi selebra loron Juventude 12 Novembru Prezidente Federasaun Tenis De Timor-Leste (FETTIL) Aniceto Cardoso Alves hatente FETTIL realiza kompetisaun tenis tanba hetan apoiu husi Sekretáriu Estadu Joventude no Desportu ho total osan $750.000, nomós hetan apoiu órsamentu husi kompañia Cement CONCH ho total órsamentu $500 no osan rejistu husi klubu sira dolar $30.00 kada ekipa no total órsamentu utiliza ba kompetisaun Tenis 12 de Novembru hamutuk $830.000 dollar Amerikanu.

‘’Sinte triste-uituan tanba la marka prezensa husi parte governu Sekretáriu Estadu Joventude no Desportu (SEJD) maibé nafatin fó korazen ba jogadór sira hodi bele motiva a’an atu esforsu nafatin hodi bele hadi’a progresu iha futuru’’. Dehan Presidente FETTIL. Aniceto Cardoso haktuir, konpetisaun ne’e partisipa husi jogadór 98 mai husi klubu rua mak hanesan klubu Melati no klubu Bebonuk, iha mós jogadór internasionál sira ne’ebé mak husi funsionáriu Embaixada balun iha Dili laran.

‘’Kompetisaun ne’e hala’o durante semana rua tanba hetan órsamentu tarde husi parte governu tan ne’e tenke hala’o besik iha loron 12 Novembru no ensera iha dia 23 fulan Novembru.’ ’Dehan Prezidente Federasaun Tenis De Timor-Leste (FETTIL) Aniceto Cardoso Alves ba jornalista sira iha kampu Tenis iha Kaikoli, Sábadu (23/11/2019)


Primeiru Lugar husi kompetisaun Tenis iha klase Senior ba tasa 12 Novembru Oki Martins Soares hatete sinte kontente boot tanba bele hetan primeiru lugar tanba esforsu tomak ne’ebé mak hala’o ona durante nee. ‘’Sei esforsu a’an nafatin atu bele hetan progresu ida di’ak liutan ba futuru, hodi bele nafatin partisipa iha kompetisaun nasionál no mós bele hetan oportunidade hodi partisipa iha nivel internasionál hodi bele lori Timor-Leste nia naran ba nivel Internasionál,” Dehan Oki

Reprezentante Sponsor husi kompaña Cement CONH Lisa Tilman hateten, Cement CONCH iha inisiativa hakarak sai mós sponsor ba kompetisaun ne’e tanba hakarak mós atu fó korajen ba joven sira hodi hasa’e sira nia espíritu desportu liu husi kompetisaun ida nee, Cement CONCH nia apoiu liu husi fundu balun maibé la hare ba nia montante tanba importante mak tenke partisipa hodi hasa’e abilidade joven iha desportu.

‘’Husu ba kompaña privadu sira atu bele mós involve atu fó apoiu liu-husi kompetisaun hirak hanesan nee tanba laos ita mak atu halo se fali mak sei halo.’’ Dehan Jerente Lisa Tilman ba jornalista Business Timor. Prezidente Federasaun De Tenis De Timor-Leste Aniceto Cardoso Alves, husu ba joven sira hotu ne’ebé mak iha talentu desportu bele mai iha Federasaun hodi bele hetan oportunidade hodi tuir treinu atu bele prepara a’an ho di’ak atu partisipa mós iha kompetisaun nasionál ruma iha futuru. Iha eventu ne’e Primeiru lugar hetan osan dollar Amerikanu $400 tuir kapasidade ne’ebe mak federasaun iha. (BT)