DÍLI----Desportu GOLF nudar desportu ida ne’ebé ohin loron kuinesidu iha mundu Internasional maibe liga ba iha Timor-Leste desportu refere nudar jogu ne’ebé foun iha ambiente sosiedade no Joventude sira. Maske foun maibe presiza dezenvolve mos Jogu GOLF ba joven sira oinsa bele lori Timor-Leste nia naran iha Mundu Internasional.

Tan ne’e Tuir kampionatu GOLF Cooperated Competition Allen Freitas Cardoso hateten katak joven sira presiza atu hola parte iha jogu refere laos deit ba iha ema ho nivel a’as.

“Desportu sai fatór importante ida atu bele lori Timor-Leste ba mundu tan ne’e governu presiza atu promove mós jogu GOLF iha Timor-Leste ba joven sira atu bele hetan oportunidade hodi partisipa iha formasaun liu husi pratika atu iha futuru ne’ebé mós lori Timor-Leste ba nivel internasionál,” dehan Kampionatu GOLF Cooperated Competition Allen Freitas Cardoso ba BT iha Rai Henek Mutin, Meti-Aut, Dili, Domingu (27/10/2019).

Allen Freitas Cardoso hateten durante ne’e ema barak hanoin katak jogu GOLF merese deit ba ema riku sira no la merese ba iha ema ne’ebé laos ho nivel refere maibe realidade ida ne’e la akontese iha jogu refere, importante mak iha boa vontade hodi partisipa. “Ema barak iha perspetiva katak jogu GOLF sai nu’udar jogu ida ba ema riku sira de’it maibé ida ne’e hanoin ida ne’ebé sala. Timor-Leste mós bele hetan oportunidade bele hakat ba faze inisiu hodi hetan preparasaun ba Jogu GOLF,” katak nia.

Nia afirma katak Jogu GOLF bele involve ema iha nivel hotu-hotu atu bele aprende no pratika, tanba GOLF nu’udar jogu ida ne’ebé bele forma indivídu ida atu bele foka nia konsentrasaun ba tarjetu ruma. Tan ne’e joven sira presiza hetan formasaun ruma atu bele prepara fíziku no mental ne’ebé benefísiu liuba pesoál ruma.

“Agradese tebes tanba oras ne’e kompañia Timor Plaza bele investe mós ba kampu GOLF nian iha Area Branca ida ne’e sai orgullu boot ida atu ema hotu iha oportunidade bele mai pratika GOLF iha ne’e,” dehan Kampionatu GOLF Cooperate. Hare ba desportu refere nia sujere ba iha governu liu-liu Sekretariu Estadu Joventude no Desportu (SEJD) atu bele preve orsamentu ruma oinsa bele prepara joven sira hodi bele tuir formasaun refere hodi nune’e iha futuru Timor-Leste mos bele partisipa iha eventu nivel Regional nomos mundial nian.

‘’Tan ne’e husu ba parte governu atu karik ba futuru bele preve mós orsamentu ruma hodi fó kapasidade ba joven sira liu husi program Sekretáriu Estadu Joventude no Desportu, tanba ida nee sai momentu furak tebes ba Timor-Leste atu bele involve aan iha jogu GOLF tanba iha futuru bele lori Timor-Leste nia naran sai morin iha mundu internasionál,” dehan nia. (BT)