DÍLI----Organizasaun Naun Govermental Child Fund realiza programa Desportu ida naran Pass It Back hodi fó oportunidade ba joven sira atu bele hetan formasaun ba abilidade moris hodi muda sira nia vida moris iha futuru.

Staff Child Fund Asuntu Programa Pass It Back Joanico Da Costa Belo hateten, Jogu Pass It Back nu’udar Desportu inovativu ida ne’ebé mak sei forma joven sira liu husi jogu no fahe koñesimentu liu husi pratika no teoria iha kampu no foka liu ba edukasaun abilidade moris ba labarik feto no mane.

Iha jogu ne’e sei fó valores importante lima mak hanesan Solidariedade Integridade, Dixiplina, Paixaun, Respeitu, Pontus hirak nee sai prinsípiu fundamental ida atu oinsá bele forma joven ho idade 11-16 atu bele muda sira nia moris iha futuru no mós sei lori mudansa pozitivu ba sira nia família no komunidade rasik.

Alende husi pontu importante lima iha mós formasaun fundamental rua mak hanesan salva guarda no primeiru sekuru nian atu nune’e joven sira bele komprende oinsá atu proteje sira aan no bele responde imediatamente ba akontesimentu emerjénsia ruma iha dezastre. Rekoñeseduni katak iha dezafiu ba implementa programa desportu Bola Aidila ou Rugby ida nee tanba inan aman sira barak seidauk familiár ho jogu nee no pesoál barak mak imajina katak jogu ida nee sempre refere ba kontaktu fíziku.

No rasaun seluk hakarak atu utiliza oan nia tempu tenke ba hala’o serbisu seluk bainhira sai eskola ho rasaun hirak nee halo inan aman ladún fo oportunidade ba oan sira atu mai partisipa. Dehan Ofisial Programa Pass It Back Joanico Belo ba jornalista Business Timor iha Fatin formasaun Ailok Laran, Kinta-Feira (24/09/19).

Iha fatin hanesan nia hatutan tan katak jogu Bola Aidila (Rugby) ida nee modifika ona hodi jogu inovativu ida ne’ebé mak sempre foka liuba oinsá atu dada sai sintu (rub tag) no jogu nee iha kombinasaun entre pratika ba desportu no teoria ba abilidade moris iha tempu ne’ebé mak hanesan.

Treinadór Foun Jerónimo Armando dos Santo De Carvalho sinte orgullu tebes bele partisipa iha programa jogu Pass It Back tanba bele hasa’e nia koñesimentu kona ba abilidade moris oinsá atu prepara aan atu bele hasoru dezafiu moris no forma mentalidade pesoál ida-ida atu sai lideransa iha futuru. Pesoalmente sinte iha ona mudansa bot ba aan rasik tanba bele muda duni hanoin negativu sai pozitivu.

Antonia Luzia Parada Dos Santo nu’udar treinadór foun ho idade 19 husi munisípiu Likisa sinte kontente tebes tanba bele hetan mós oportunidade tuirformasaun durante semana ida hodi fó mudansasignifikante tebes ba nia an. Oras nee bele ona hatene respeitu no fahe tempu ba tempu eskola no mós bele hala’o atividade jogu rugby nian. Oras nee sinte bele komprende di’ak liu kona-ba balansu Jéneru hodi komprende katak joven feto mós bele hetan oportunidade atu hala’o atividade saida de’it hanesan mane. 

Diretora Child Fund ERINE DIJKSTRA Hateten sinte orgullu tebes tanba bele realiza jogu ida koñesidu oan iha mundu no oras nee bele tama ba Timor-Leste, Programa ba desportu nee hanaran Pass It back (Rugby) iha munisípiu Likisá, objetivu husi realiza jogu ida nee hodi fó oportunidade ba joven sira atu hetan formasaun ba sira nia fíziku no mós mentalidade ne’ebé mak di’ak. Haksolok tebes mós tanba bele hare serbisu makas tebes husi treinadór foun sira ne’ebé tuir ona formasaun durante semana ida no appreciate tebes ba imi hotu nia dedikasaun tomak.

Mensajen Husi Staff Pass It Back Joanico da Costa Belo husu ba inan aman sira atu bele fó tempu ba oan sira bele partisipa iha programa Pass It Back bainhira disponivel iha imi nia munisípiu tan programa ida fó benefísiu di’ak ba oan sira nia moris, labele iha perspetiva katak jogu ida nee sai risku ba sira nia fíziku maibé jogu nee sai inovativu ona hodi foka liu ba joven sira nia abilidade moris. No mós iha futuru bele lori joven sira bele ba tuir kompetisaun iha nasaun viziñu sira no bele garante serbisu ba sira hodi bele hetan rendimentu hodi muda sira nia moris. (BT)