DÍLI----Tinan ne’e klube Karketu Dili Fc hetan tan apoiu foun hosi kompañia Indonesia ho naran FITSEE, hodi sai hanesan appareal ba klube.

Presidente Klube Karketu Dili Fc Jose Adilson Ribeiro hatete, tinan ida ne’e Karketu Dili Fc hetan tan sponsorShip foun hosi Indonesia, liu hosi Kompañia FITSEE hodi sai hanesan appareal ba klube hodi apoiu ekipamentus futebol nian ba Karketu Dili Fc.

“Foin lalais ami halo ona kontaktu ou ligasaun ho kompañia appareal ida hosi Indonesia ho naran FITSEE, tanba kompañia refere maka durante ne’e produs ekipamentus futebol hodi apoiu Liga 3 Indonesia nian hosi Jawa Timor, sira prontu apoiu ami hodi sai hanesan appareal ami nian,” imforma Adilson.

Tanba ne’e foin lalais Karketu Dili Fc halo ona ligasaun hodi hasoru malu ho Kompañia FITSEE no FITSEE rasik prontu fo apoiu ba Karketu Dili Fc iha epoka ida ne’e, hosi parte ekipamentus nian hodi sai hanesan appareal ba Karketu Dili Fc, esplika Presidente Karketu Dili Fc.

Adilson hatutan, dala ruma Karketu Dili Fc sei hetan tan apoiu finanseiru hosi kompania seluk, tanba iha akordu ne’ebé iha ho kompañia FITSEE i FITSEE prontu atu halo mos ligasaun ho kompañia seluk, para apoiu Karketu Dili Fc iha parte finanseiru. Adilson sublinha katak, alende ida ne’e klube mos tenta hela halo hikas ligasaun ho kompañia hirak ne’ebé antes ne’e apoiu ona klube hanesan, Bintang no Kreative Furak. Atu nune’e sira bele apoiu hikas Karketu Dili Fc iha epoka dahat Liga Futebol Amadora.

Entertantu Karketu Dili Fc antes ne’e iha sosiu hamutuk ema nain 7 no sponsorShip nain 2 maka apoiu klube, maibe iha epoka datolu liu ba menus ona. tanba impkatu hosi impase politik ne’ebé antes akontese iha timor, tanba maioria sosio sira ne’e vida negosiu (emprezario). I agora ba epoka dahat sosio hirak ne’e deklara katak, sira rezigna a’an hosi responsavel hanesan sosio ba klube, ne’e duni ida ne’e sei defikulta preparasaun klube nian ba epoka dahat.

Adilson akresenta katak, agora sosio ne’ebé sei nafatin apoiu klube provolta nain 3, maibe klube nafatin loke dalan hodi halo diskusaun ho sosio hirak ne’ebé rezigna a’an ona, para apoiu nafatin klube. Maske bele la apoiu hanesan tinan hirak liu ba, Pelumenus apoiu netik tuir sira ida-idak nian kbiit. (BT)