DÍLI----Kompañia Timor Plaza hahu loke atividade jogu Golf iha Timor-Leste, hodi fo motiva ba joventude foin sae sira. owner ba fatin Golf Tony Jape hatete, atividade ne’e sira komesa loke ona iha semana rua liu ba atu ema hotu bele mai joga (halimar) Golf, maibe eventu refere foin primeiru vez sira loke iha Timor Leste atu ema bele partisipa hodi nune’e bele promove diak liu tan jogu Golf nian, liu-liu ba timoroan sira.

“Iha atividade ne’e la iha kriteria i livre ba ema hotu ne’ebé hakarak mai atu halimar (Golf), ne’e dunik tantu ema ne’ebé atu mai aprende no sira ne’ebé professional mos livre para mai halimar iha ne’e,” dehan Tony Jape ba BT iha Timor Plaza Foin lalais ne’e.

Tony realsa liu tan, kompetisaun refere kada fulan sei nafatin realiza, hodi nune’e bele motiva diak liu tan talentu ema nian liu-liu ba foin sae sira iha Timor-Leste ne’ebé iha interese hakarak aprende Golf inklui bele dada mos turista no emprezariu sira hodi mai halimar iha fatin refere. Tony sublinha, iha kompetisuan refere hetan partisipasaun emprezariu no turista sira hamutuk 18 pessoas kompostu hosi feto no mane.

“Ho atividade Golf ida ne’e iha Timor-Leste bele fo oportunidade diak ba foin sae sira para aprende diak liu tan, hodi nune’e iha futuru bele prepara hodi kompete iha eventu internasional sira,”Afrima Tony. Entertantu primeiru lugar ba kompetisaun Golf refere maka Tony Jape, segundu lugar Vinay Matur no terseiru lugar Rich Mobinson. (BT)