DÍLI----Assistente Treinador Ekipa Selesaun Nasional Timor-Leste Eduardo Perreira, garante ekipa Sub-22 sei marka istoria foun iha jogu Asian Federasaun Futebol (AFF) ne’ebé realiza iha Kambodia.

Asisten Treinador Ekipa Selesaun Nasional Eduardo Perreira hatete, preparasaun ne’ebé sira halo kuaze semana 3 ho masimu no lao di’ak tebes, tanba agora federasaun futebol fo apoiu masimu ba preparasaun ne’ebé maka ekipa nasional halo, tantu iha parte tékniku no mediku.

“Preparasaun ne’ebé maka ami halo kauze semana 3 deit, maibe masimu no lao di’ak tebes tanba agora federasaun futebol fo apoiu masimu ba preparasaun refere, tantu iha parte teknik no mediku (doutor),” dehan Edu ba Jornalista BT wainhira remata despedida ho ekipa Sub-22 iha Xanana Sport Center, kinta-feira semana liubá.

Edu hatutan, hosi preparasaun ne’ebé maka sira halo, foka liu ba parte tekniku no taktika. hodi hadia fali failansu ne’ebé durante ne’e akontese iha jogu Suzuki Cup, tanba ne’e failansu hirak ne’e sira hadia ona. Maibe hosi numeru jogador ne’ebé iha, provolta nain 2 ou 3 maka la konsege partisipa, tanba balun sira nia klubu maka la fo autorizasaun hanesan João Pedro tanba atu ba joga iha liur inklui mos jogador balun, imforma Assisten Treinador.

“Ne’e dunik ba refere hau esperansa tebes, tanba ekipa ida agora ne’e solido tebes. Ne’e dunik iha jogu primeira parte kontra ekipa Thailandia, hau fiar katak ita sei rejulta 3 pontus. Hodi nune’e bele halo istoria foun ba Federasaun Futebol Timor-Leste inklui mos nasaun Timor-Leste tanba jogador sira ne’e maioria sempre joga hamutuk, tantu iha turneiu internasional no nasional.

Entertantu ekipa Timor-Leste akumula iha Pool A kompostu hosi nasaun Thailandia, Vietnam, Filipina no Timor-Leste. Ne’e dunik pool refere nia rekonhese hanesan pool infernu (neraka), maibe liu hosi preparasaun ne’ebé iha, nia fiar katak, Timor-Leste sei bele halakon nasaun hirak ne’e. (BT)