DÍLI----Orsamentu ba subsídiu atleta no klube sira inklui atividade Liga Futebol Amadora (LFA), Sekretaria de Estado Juventude no Desportu (SEJD) preve ona iha Orsamentu Jeral do Estado (OJE) 2019.

Diretór Nasionál Desportu João Rodriques hatete, prosesu atribuisaun subsídiu ba atleta Timor-Leste ne’ebé ofrese ona medalla ba nasaun, oras ne’e seidauk atribui tanba orsamentu jerál estadu 2019 seidauk la’o normal, maibé SEJD preve ona iha OJE 2019.

“Subsídiu refere ita tenke fó ba atleta sira, tanba ita nia atleta balun hosi defisiente ofrese ona medalla osan mean ba nasaun inklui atleta sira seluk, ne’e duni ita tenke valoriza sira liu hosi prestasaun ne’ebé sira hatudu ona iha eventu internasional. Tanba ita nia lei diploma atleta nian mensiona katak, kuandu atleta sira hetan medalla iha 2018 ita halo subvensaun hodi atribui iha 2019, tanba ne’e maka agora ita hein deit ba prosesu hosi OJE 2019.

Ne’e duni kuandu OJE 2019 la normal maka ita sei atribui subsídiu ba atleta sira ne’ebé hetan ona medalla”imforma João. João hatutan, atleta ne’ebé sei hetan subsídiu hosi governu maka hanesan Teofilio hosi modalidade atletizmu (defisiente) no atleta feto ida hosi modalidade tenis meja.

Ne’e duni atleta hirak ne’e maka sei simu subsídiu tuir rekejitus ho klasifikasaun medalla ne’ebé hakerek ona iha lei KND. João realsa katak, lei KND hetan apresiasaun hosi Konselhu Ministru iha 2017 depois maka foin vigora iha 2018, tanba ne’e atleta ne'ebé iha direitu atu hetan subsídiu maka hahu iha tinan 2018.

Dirétor Nasional Desportu ne’e mos akresenta katak, kestaun konaba subsídiu klubu nian ne’ebé SEJD seidauk atribui iha tinan 2018 i ida ne’e Sekretaria de Estado mos hatene ona, tanba ne’e iha tempu besik SEJD sei konvoka reuniaun ho Orgaun LFA, para halo diskusaun ba kestaun hirak ne’e inklui kongresu LFA nian, tanba mandatu hosi sturuktura LFA remata ona iha fulan Outubru 2018 inklui mos situasaun seluk ne’ebé sempre akontese iha liga nia laran.

João reafirma katak, subsídiu orsamentu ba klubu nian SEJD seidauk distribui ba Orgaun LFA hodi transfere ba klubu sira iha 2018, tanba momentu iha 2018 orsamentu la sufiente atu atribui ba klubu sira, tanba momentu iha 2018 governu lao ho orsamentu duadesimu. maibe agora orsamentu subsídiu klubu nian SEJD preve ona iha OJE 2019, tanba ne’e hein deit prosesu hosi OJE 2019 lao normal maka SEJD sei distribui ba LFA hodi transfere ba klubu sira. Entertantu orsamentu ba atividade liga futebol amadora, subsídiu atleta no subsídiu klubu SEJD prevene hotu ona iha OJE 2019. (BT)