DÍLI----Relasiona ho jogu Arafura Games Australia ne’ebé tuir planu sei realiza iha fulan Abril 2019, Sekretaria de Estado Juventude no Desportu (SEJD) sei hamenus numeru Federasaun no Atleta, tanba orsamentu la sufisiente atu kobre modalidade barak.

Sekretariu de Estado Juventude no Desportu (SEJD) Nelio Isac Sarmento hatete, konaba partisipasaun Timor-Leste ba jogu Arafura Games Australia, governu la iha osan sufisiente, ne’e duni se Timor-Leste hakarak hatudu nia partisipasaun iha jogu Arafura Games, maka númeru federasaun no atleta tenke hamenus tanba osan la iha.

“Kona-ba partisipasaun atleta ita nian iha jogu Arafura Games Australia, governu la iha osan sufisiente, tanba ne’e se Timor-Leste hakarak hatudu duni nia partisipasaun iha jogu Arafura Games, maka ami sei hamenus volume ou numeru federasaun no atleta tanba kondisoens ita nian,” deklara Nelio.

Nelio hatutan, desizaun ne’e governu foti tanba hare’e ba kondisaun rai laran, ne’e duni orsamentu atu lori atleta sira ba partisipa iha jogu Arafura Games la sufisiente. Maibe se Timor-Leste hakarak lori nasaun nia naran ba partisipa iha eventu refere, maka tenke hamenus duni numeru federasaun no atleta, tanba governu la iha osan sufisiente.

Ne’e duni situasaun refere iha temu badak parte SEJD sei reuniaun hodi halo linha kordenasaun ho CONTL no CDTL hodi diskuti asuntu refere. Tanba ne’e nia fo mensagen ba federasaun sira hotu katak, la bele hare’e osan iha maka foin treinu, maibe preparasaun ne’e tenke halao nafatin hodi nune’e loron to bele partisipa. (BT)