DÍLI----Bazeia ba rekrutamentu Treinador ba ekipa Selesaun Nasional Timor-Leste Sub-18 no 19, ne’ebé halao hosi Federasaun Futebol Timor-Leste (FFTL) eis Treinador Atletico Ultramar Fc Andi Susanto (Indonesia) maka selesionadu.

Dirétor Tekniku FFTL Gaspar Quintão hatete, eis Treinador Atletico Ultramar Fc Andi Susanto (Indonesia) agora sai hanesan Treinador ba ekipa Selesaun Nasional Timor-Leste ba Sub-18 no 19, i ida ne’e desizaun hosi membru ezekutivu FFTL mak hili.

“Eis Treinador Atletico Ultramar Fc Andi Susanto (Indonesia) agora Membru Ezekutivu FFTL sira, desisi hodi hili nia hodi kaer fali ba ekipa Selesaun Nasional Timor-Leste hosi Sub-18 no 19,” dehan Gaspar ba Jornalista BT iha knaar fatin FFTL, kuarta-feira (06/02).

Gaspar hatutan, Andi hahu nia kareira hanesan Treinador ba ekipa Selesaun Nasional Sub-18 no 19 iha semana kotuk liu ba, desizaun ne’e membru ezekutivu hili tanba bazeia ba nia prestasaun durante kaer klubu Atletico Ultramar Fc iha Liga Futebol Amadora.

Tanba wainhira nia kaer klubu Atletico Ultramar nia konsege ultrapasa Atletico Ultramar Fc hosi segundu divizaun ba primeiru divizaun, Kampiaun iha Taça 12 Novembru no terseiru lugar iha LFA, ne’e duni ho prestasaun hirak ne’e maka membru ezekutivu sira hili nia hodi kaer ekipa Sub-18 no 19” esplika Dirétor Tekniku FFTL.

Gaspar realsa katak, konaba kontratu Andi Susanto sei termina iha tinan ne’e, hahu hosi halo preparasaun no partisipa jogu AFC, AFF no kualifikasaun Copa Mundial 2020, jogu refere sei hahu partisipa iha fulan Agostu 2019.

“konaba kontratu Andi Susanto nian la to tinan ida, tanba kontratu hahu hosi halo preparasaun to jogu remata (partisipa), jogador ne’ebé Andi prepara atu ba kompete iha jogu AFC, AFF ChampionShip hosi Sub18 no kualifikasaun Copa Mundial 2020 hosi jogador Sub-19, ne’ebé tuir planu eventu hirak ne’e sei halao iha fulan Agostu 2019 iha Vietnam” imforma Gaspar.

Gaspar akresenta katak, kriteria atu kaer ekipa selesaun nasional sempre liu hosi CV no Andi rasik antes ne’e kaer ona klubu balun iha Timor hodi kompete iha Liga Futebol Amadora, tanba ne’e atu koalia konaba viola lei ruma i ida ne’e la viola, tanba statutu hosi FFTL nian la mensiona ida ne’e, keta lei governu nian karik.

Tanba kriteria hotu liu hosi rekrutamentu hare’e hosi CV no prestasaun ho ida ne’e maka ikus mai membru ezekutivu desidi Andi maka pasa iha selesaun refere, hodi kaer ekipa Sub-18 no 19. Entertantu hosi parte Diresaun Tekniku nian sempre rekomenda ba treinador sira atu hatama relatoriu kada semana, hodi nune’e parte teknik bele halo avaliasaun hodi hatene progresu durante iha treinu laran. (BT)