DÍLI----Klube jigante Dili weste Karketu Dili Fc deklara katak, karik iha epoka 2019 maka Sekretaria de Estado Joventude no Desportu (SEJD) ho Orgaun Liga Futebol Amadora (LFA) la hadia planu no jestaun ne’ebé diak, maka sira sei la partisipa iha jogu LFA.

Presidente Klube Karketu Dili Fc Jose Adilson Ribeiro hatete, momentu ida ne’e (agora dadaun) atividade klube nian sira sei hapara, tanba to agora seidauk iha imformasaun ida serteza konaba atividade Liga Futebol Amadora ba epoka dala-hat 2019.

Adilson hatutan, alende ida ne’e imformasaun ne’ebé la formal, ne’ebé sira rona katak Sekretaria de Estado Joventude no Desportu (SEJD) sei transfere fali LFA ba FFTL (alias FFTL mak organiza), maibe ida ne’e seidauk serteza. “Ne’e dunik hosi parte ami nian (Karketu Dili Fc) seidauk bele termina atu partisipa iha Liga Futebol Amadora ba epoka dala-hat, kalae. Tanba ami sei hare’e lai planu ba oin ne’e SEJD atu halo oinsa.

Tanba esperensia tinan kotuk hatudu ona katak, ita obriga a’an lao deit mais, ita obriga ho kondisaun ne’ebé la merese ita atu halo hodi fo afeita makas ba ami klube sira. Tanba ne’e maka ba epoka 2019 Karketu Dili Fc sei hare’e hodi estuda ba prosesu hosi planu liga ne’e rasik” deklara Presidente Karketu Dili Fc ba Jornalista BT iha nia k’nar fatin, Kuarta-Feira (23/01).

Adilson sublinha katak, wainhira SEJD tenta transfere LFA ba FFTL hodi organiza, ida ne’e la sai kestaun ba Karketu Dili Fc. Maibe primeiru importante ba sira maka SEJD tenki jere didiak Liga Futebol Amadora, hodi nune’e minimal maske Liga ne’e Amadora, maibe tenki jere para bele iha nilai jual. Segundu SEJD tenki tur hamutuk ho LFA para buka solusaun hodi nune’e bele rezolve subsídiu klube sira nian iha epoka 2018, ne’ebé sira promesa ona atu fo ba klube.

“Ne’e dunik ba ami, SEJD atu muda LFA ba FFTL kalae, ida ne’e ba ami sei la tau kestaun, maibe importante liu maka SEJD, LFA no FFTL tenki hadia lai failansu ne’ebé antes ne’e sempre repete (kontinua halo), tanba tinan barak ami sempre sai vitima hela deit ba failansu ne’ebé sira halo (alias la iha kordenasaun), exemplu maka jadwal kompetisaun no seluk tan” dehan Adilson.

Tanba ne’e atu muda LFA ba FFTL buat sira ne’e la’ós problema, maibe problema maka oinsa SEJD tur hamutuk ho LFA para kria planu ho jestaun ida ne’ebé ke diak. Pelumenus la 100% maibe diak netik, para klube sira ba partisipa iha liga ne’e bele senti katak, investimentu ne’ebé sira halo sei la lakon let, hakotu Presidente Karketu Dili Fc. Entertantu to notisia ne’e tun parte Jornalista BT la konsege komfirma ho parte relevante, tanba sempre okupadu. (BT)