DÍLI----Governu Korea liu hosi ajénsia KOICA sei apoiu Millaun $6 hodi dezenvolve setór Desportu Eskolar ho Komunitariu no Igualidade Jeneru iha País Timor-Leste.

Dirétor Nasional Desportu SEJD, João Rogriques hatete, relasiona ho prosesu negosiasaun entre Governu Timor-Leste ho KOICA (Korea) konsege hatama proposta 7 ba KOICA no KOICA konsege aprova proposta 2 maka hanesan Desportu Eskolar Komunitariu no Igualidade Jeneru.

“Relasiona ho prosesu negosiasaun entre Governu Timor-Leste ho KOICA (Korea) ba proposta 7 ne’ebé ita hatama ba KOICA, KOICA konsege aprova proposta 2 maka hanesan, Desportu Eskolar Komunitariu no Igualidade Jeneru,” dehan Diretór Nasional Desportu João Rogriques ba BT foin lalais ne’e.

Nia dehan ho rezultadu ne’ebé mak iha oras ne’e parte Governu liu husi SEJD hahu preparasaun no tama ona ba fase reuniaun tékniku hodi bele aprezenta ba Ajénsia KOICA kona ba fasilidade sira hanesan eskola, infrastruktura, edukasaun fisika tanba prosesu dezenvolvimentu desportu la’ós mesak, maibe sempre ligasaun ba malu.

“Atividade refere KOICA sei hahu implementa iha 2020-2024, tanba ne’e sira sei mai apoiu ita iha parte rekursu humanus tanba ita nia rekursu humanus sei minim, fasilidade, kompetisaun, sistema integradu ba dezenvolvimentu desportu hanesan, eskolar, klubus no federasaun inklui nivel nasional,” afirma João ba Jornalista BT.

João hatutan, objektivu enjeral ba atividade refere maka atu dada partisipasaun joventude sira nian ba prosesu dezenvolvimentu tanba iha atividade rua KOICA sei hahu implementa iha tinan 2020-2024 ho montante orsamentu hamutuk millaun $6.

João subliña katak, liga ba apoiu fasilidade, KOICA sei konstrui Kampo Futsal ba nivel eskolar sira, maibe hosi kampo refere sei sai mos hanesan kampo multi funsaun ba atividade Volibol no Basketbol. Entertantu konaba numeru kampu hirak ida ne’e seidauk hatene, maibe emprinsipiu sei konstrui kampo barak iha Timor-Leste. (BT)