DÍLI----Eventu Festival Nasional Desportu (FND) iha tinan ne’e Munisipiu Baucau mak sei sai uma na’in tanba determina ona Sekretariu Estadu Joventude Desportu (SEJD).

Presidente CDTL Afranio Xavier Amaral hatete, relasiona ho eventu FND tuir planu sei realiza iha tinan 2019, maibe ida ne’e mos depende hosi prosesu desizaun hosi Presidente da Republika ba Orsamentu Jeral do Estado (OJE). Ne’e dunik se Presidente da Republika promulga OJE 2019, maka eventu FND positivu sei realiza iha 2019.

“Konaba realizasaun eventu FND tuir planu sei realiza iha tinan 2019, maibe ida ne’e mos depende hosi prosesu desizaun hosi Presidente da Republika nian ba Orsamentu Jeral do Estado (OJE). Ne’e dunik se Presidente da Republika promulga OJE 2019, maka eventu FND klaru sei realiza tuir kalendariu iha tinan ne’e” dehan Afranio. Afranio hatutan, eventu FND tuir planu sei realiza iha munisipiu Baucau, tanba antes ne’e desidi ona hosi governu anterior SEJD nian iha tinan hirak liu ba.

Tanba ne’e iha tinan 2019 eventu FND, munisipiu Baucau maka sei sai hanesan uma nain ba eventu refere. Afranio subliña katak, eventu FND normalmente tuir kalendariu sei realiza entre fulan Agostu ou Setembru, tanba entre fulan rua ne’e maka alunus sira feriadu k’leur. Ne’e dunik entre fulan rua ne’e maka sei realiza eventu FND iha munisipiu Baucau.

Presidente CDTL akresenta katak, konaba modalidade ida ne’e depende hosi orsamentu, ne’e dunik se orsamentu bo’ot maka CDTL sei aumenta modalidade, maibe se orsamentu nafatin maka CDTL sei kontinua uja modalidade 4 ne’ebé antes iha ona i hanesan mos karik orsamentu tun (menus) maka sei hamenus mos modaldiade ba eventu FND rasik. ne’e dunik buat hotu depende hosi orsamentu ne’ebé SEJD propoin/aloka ba eventu FND. (BT)