DILI----Osorio Florindo promesa se karik eleitu hanesan Presidente iha kongresu Federasaun Futebol Timor-Leste (FFTL), nia sei halo mudansa radikal iha FFTL.

Kandidatura kongresu FFTL Osorio Florindo hatete katak, se karik iha kongresu FFTL ba periode 2018-2022 mak nia konsege eleitu hanesan Presidente ba FFTL, nia sei halo mudansa radikal iha FFTL nia laran, atu nune’e movimentu futebol bele mobiliza to baze.

“Hau hanoin bola ne’e iha timor ema hotu koalia bola, maibe dalan atu servisu hamutuk ho organizasaun no FFTL mak susar uituan. ne’e dunik se hau eleitu, prinsipiu ida mak tenki nakloke ba ema hotu para halo servisu tuir k’nar ne’ebé ita fo, inklui hadia buat ne’ebé durante la diak iha ema hotu nia matan no buat ne’ebé diak ita kontinua avansa hodi halo diak liu tan,” Osorio Florindo.

Ne’e dunik se karik nia eleitu hanesan Presidente FFTL iha Kongresu fulan oin, nia sei fo servisu makas liu ba Vise Presidente ida-idak no membru ezekutivu sira hotu tuir k’nar ne’ebé sira asumi inklui Presidente Assosisaun sira, hodi nune’e bele hadia (dezenvolve) desportu to iha baze. Inklui diresaun ne’ebé tuir statutu tenki kria tanba durante ne’e la iha, hodi nune’e ema barak bele imvolve iha prosesu dezenvolvimentu desportu.

Tanba ne’e kada struktura ida-idak nia k’nar tenki fahe, para sira bele asumi tuir k’nar refere ho responsavel. Hodi nune’e bele evita tia atitude ne’ebé antes tinan barak akontese iha FFTL alias mai tur deit fulan simu salariu,esplika Osorio ba Jornalista BT wainhira dadalia iha edifisiu FFTL, sesta-feira (19/01).

“Ita hatene katak iha futebol laos hare’e deit ba jogador selesaun nasional, maibe ita mos iha jogador Sub sira seluk inklui servisu seluk, ne’e dunik kada membru struktura ida-idak tenki fahe tuir esprensia sira nian para bele dezenvolve seitor sira ne’e. tanba ne’e dala ida tan hau sei fo fatin ba ema sira ne’ebé durante koalia bola/hatene bola mais FFTL nunka uja”afirma Nia.

Osorio sublinha katak, depois mos sSei koalia ho governu para dada fali Liga Futebol Amadora (LFA) hodi hela hamutuk ho FFTL iha FFTL nia edifisiu para servisu hamutuk, hodi nune’e bele halo koordenasaun diak liu tan, atu bele hadia failansu no servisu lubuk ne’ebé antes seidauk realiza, exemplu hanesan fo formasaun ba arbitu sira hodi nune’e bele hadia situasaun ne’ebé antes akontese para hasae sira nia ablidade.

Ne’e dunik se karik nia konsege eleitu ba Presidente FFTL programa prinsipal primeiru ne’ebé nia sei avansa mak oinsa organiza hamutuk ho klubu sira para klubu bele hetan licens klub. Tanba ne’e situasaun sira ne’e imprinsipal tenki servisu hamutuk ho governu.

“Tanba ne’e ba hau se deit mak eleitu ne’e la iha problema, maibe importante mak oinsa bele dada ema sira ne’ebé hatene konaba futebol, maibe FFTL nunka dada (uja) inklui assosiasaun sira, tenki partisipa. Atu nune’e bele dezenvovle diak liu tan futebol iha Timor-Leste,”deklara Osorio.

Osorio realsa liu tan katak, Planu prioridade seluk mak atu koalia ho governu para oinsa bele mobiliza emprezariu sira hodi partisipa iha desportu, hodi bele hetan fundus desportu husi emprezariu sira, para la bele hein deit governu. (BT)