DILI----Kampiaun epoka 2017 Karketu Dili Fc (Matak Malirin) sei kompete ho jogador lokal iha epoka 2018 Liga Futebol Amadora (LFA). Atual Presidente Karketu Dili Fc ba periode 2018-2020 Jose Adilson Ribeiro hatete, relasiona ho janela tranferensia ne’ebé LFA loke hahu husi dia (31/12/17-31/01/18), parte Karketu Dili preparadu ona hodi rekruta jogador foun tanba ne’e klubu halo ona aprosimasaun ho jogador sira.

Maibé ba epoka 2018 parte Karketu Dili Fc sei kompete ho mudelu foun (warna baru) liu husi jogador lokal. “ami sei kompete ho warna foun iha epka 2018 tanba hakarak atu dezenvolve jogador lokal, maibé ba treinador ami sei uja treinador internasional foun.

Tanba ne’e jogador lokal sira ne’e parte klubu halo ona aprosimasaun ho sira para apoiu klubu kompete iha epoka 2018”esplika Presidente Karketu Dili Fc ba Jornalista BT iha k’nar fatin, kinta-feira (11/01). Maibé ba jogador ne’ebé klubu tarjetu, parte klubu halo ona negosiasaun ne’e dunik espera katak iha tempu badak klubu bele publika ona sira nia naran ba publiku. 

Adilson sublinha katak, jogador lokal ne’ebé klubu tarjetu atu kompete ho Karketu Dili Fc ba epoka 2018 hamutuk nain 6, ne’ebé sira nia pozisaun espesifiku liu iha area hanesan, striker 1, mediu avansadu 1, defesa 3 no baliza 1. Atu nune’e sira bele subtitui hikas jogador anterior estrangeirus ne’ebé klubu husik ona.

Presidente ne’e realsa liu tan katak, ba epoka 2018 Karketu Dili Fc sosa (uja) fali Treinador estrangeirus foun husi Moldoba, ne’ebé Treinador ne’e rasik nia kualidade no esperensia la ses dok husi Treinador anterior (Simon). Tanba Treinador refere (naran seidauk publika) iha mós sertifikadu nivel A husi AFC i nia mós iha esperenia barak kaer klubu primeiru divizaun husi Inodnesia hanesan, Persibandung, Persita Tangerang, Persebaya, Persija, Manukari Fc no Borneiu Fc.

Adilson akresenta katak, se karik iha janela tranferensia jogador mak klubu la konsege sosa jogador lokal tuir tarjetu klubu hodi kompleta 23jogador, mak klubu sei tenta hikas hodi sosa jogador estrangeirus nain 1-2, para apoiu klubu iha epoka 2018. Maibé em prinsipiu klubu hakarak uja jogador lokal, tanba atu sosa jogador estrangeirus ida ne’e tama iha planu segundu klubu nian.

Ne’e dunik klubu sei garantia nafatin atu defende titlu Kampiaun iha epoka 2018, maske la utiliza ona jogador estrangeirus. tanba jogador lokal ne’ebé klubu atu sosa iha hotu kualidade diak ne’ebé la iha diferensia do’ok husi jogador estrangeirus.tanba kompenete klubu nian sempre forti (unidade). (BT)