DILI----VII Governo konstitusional liu husi Secretario de Estado do Desporto e da Promoção da Alta Competição (SEDPAC), kontinua fo apoia ba Orgaun Ezecutivo Liga Futebol Amadora (LFA) atu organiza hikas LFA ba epoka 2018, nebe tuir kalendario sei hala’o abertura ba primeira jogu iha 22 de fevereiru.

"Liu husi Konselho Ministro (KM) deside ona atu apoia nafain orsamentu ba atividade ida ne’e, maske antis iha ona hanoin atu hapara liga husi KM tamba la iha orsamentu. Maibé hafoin rona esplikasaun husi ha’u, KM muda fali hanoin ba desizaun antis nee," Imforma SEDPAC, Osorio Florindo da Costa ba media sira hafoin hala’o inkontru ho Ezecutivo LFA, iha edifisiu SEDPAC, Kinta-Feira (11/01/18).

Osorio hatutan katak, apoiu ida ne’e bazeia ba realidade ne’ebé, bele hare katak LFA konsege produs kampo serbisu ba jogador nomós dirigenti klubu sira kuaze rihun ida, tanba ne’e la iha rajaun se governu hakarak hapara jogu ba epoka 2018, tanba de’it orsamentu la iha ho situasaun politika rai laran.

"Orariu ba jogu internasional nunka hakarak hatene ita nia problema politika internal, tanba ne’e se karik LFA mak paradu hikas, entaun jogador sira sei la bele kontinua ezerse sira nia funsaun nudar jogadór. ne’ebé sei fo implikasaun bo’ot ba ita nia selesaun nasional hodi hasoru jogu internasional iha tinan ida ne’e.

Tanba ne’e iha semana ida ne’e nia laran ami hein proposta no kalendario husi orgaun LFA atu ajusta hamutuk antis hatama proposta ba orsamentu dua desima nian," dehan eis Deputadu nee. Iha sorin seluk Prezidente LFA Nilton Gusmão Dos Santos senti orgulho no honra bo’ot ba SEDPAC ne’ebé ho esforsu a’an tomak defende atu bele kontinua hikas jogu ba epoka tinan nee.

"Nudar Prezidente da Liga ha’u hakarak hato’o honra boot ba SEDPAC exelencia Osorio Florindo, ne’ebé ho esforsu tomak atu bele defende nafatin iha KM hodi bele hetan suporta orsamentu atu hala’o jogu ba epoka 2018.

Alende ne’e ami husi LFA sei serbisu makas liu tan hodi bele hetan patrisinador balun atu bele apoia diak liu tan epoka 2018, hodi nune’e ita bele la’o maske situasaun politika rai laran seidauk normal hikas hodi bele separa kestaun politika no desporto, atu nune’e bele ajuda ita nia jogador nomós klubu sira hodi kontinua hala’o pratika desporto" tenik Nilton. (BT)