DILI----Confederasaun Desportu Timor-Leste (CDTL) hahú realiza Assembleia Geral ba dahuluk hamutuk ho membru federasaun 21 iha edifisiu CDTL (Jinasiu GMT). Hanesan organizasaun ne’ebé hamahon a’an no hetan apoiu husi governu, iha obrigasaun atu kria assembleia geral hamutuk ho nia membru sira kada tinan.

Atu bele hatene osan ne’ebé sira gastu, nia vantagen no dezvantagen mak ne’ebé antes atu aprezenta relatoriu ba governu. ne’e dunik CDTL hanesan exemplu ida ba organizasaun desportu tomak ne’ebé durante ne’e hamahon a’an iha governu nia okos (SEDPAK) hodi banati tuir.

Presidente CDTL Afranio Xavier Amaral hatete, tuir lolos assembleia anual CDTL hala’o iha fin de 2017, maibé tanba ho kestaun tempu ne’e mak sira foin realiza iha Janeiru 2018. “asembleia anual ne’e ami tenki hala’o tanba bazeia ba statutu ne’ebé figura ona iha lei inan CDTL iha artigu 21, hodi hatete katak kada tinan struktura CDTL tenki aprezenta relatoriu ba membru sira (Federasaun) inklui SEDPAK” esplika Presidente ne’e ba Jornalista sira iha edifisiu CDTL, tersa-feira (09/01).

Tanba ne’e iha assembleia ida ne’e sira relata liu ba atividade durante husi fulan Janeiru-Dezembru 2017, husi atividade sira ne’e mak hanesan atividade internu CDTL inklui partisipasaun eventu internasional. “ne’e dunik husi mandatu ami nian konsege hatudu progresu diak liu husi atleta sira, hodi ofrese medalia mai Timor-Leste iha eventu internasional Sea Games no eventu nasional sira seluk, inklui estabelese hikas vokal point CDTL nian iha 13 munisipiu”dehan Nia.

Afranio hatutan, maske parte balun hatudu ona progresu ne’ebé diak, maibé CDTL nafatin sei hasoru defikuldade barak, tanba sei menus rekursu humanus. Tanba ho rekursu humanus mak bele dezenvolve desportu ho diak iha Timor-Leste. Ne’e dunik planu perioridade CDTL nian mak atu kapasita membru sira, hodi bele hasae sira nia kapasidade para dezenvolve deportu (atleta).

Iha fatin hanesan Sekretaria Geral Badminton Jose Zaquelino sublinha, liu husi assembleia anual ida ne’e hanesan pratika diak ida ba CDTL hodi habelar no fahe imformasaun ba nia membru sira tomak, durante atividade ne’ebé hala’o iha tinan ida nia laran. atu nune’e vantagen no dezvantagen ne’ebé hasoru iha tinan ida ne’e bele hadia no halo diak liu tan iha futuru.

Tanba ne’e nia sujeru ba CDTL atu kria planu ne’ebé diak hodi nune’e bele eleva no forma nia membru sira ho diak liu tan, para bele dezenvolve desportu iha Timor-Leste ho diak. Entertantu orsamentu operasional ne’ebé CDTL hetan apoiu husi SEDPAK iha periodu 2017 ho montante $159,946.50. Maibé husi total orsamentu refere ne’ebé CDTL gastu ho montante $153,816.30 no restu sei ho montante $6,130.20. (BT)