DILI----Liga Nasional Basketbal Timor-Leste (LNBTL) hari’i hodi fo pratika ba ema hotu, tantu labarik, adoltus no joventude sira ne’ebé hadomi no iha talentu ba modalidade Basketbal.

Presidente LNBTL Rui Manuel Castro hatete, LNBTL hari’i iha dia (19/10/16) nudar orgaun desportu modalidade basketbal, no liga refere hari’i ho objektivu desportu ba ema hotu hahu husi labarik, adoltus no joventude.

Misaun ho vizaun husi liga ne’e rasik atu haburas talentu foin sae sira nian, hodi haklean abilidades basketbal iha timor, hodi buka fini ba futuru liu husi kompetisaun rai laran hodi prepara ba eventu internasional. “Antes tama ba liga basketbal sira nia ekipa hahu ona halo estudu banding iha Jakarta hodi hetan esperensia ba liga ne’e rasik, tanba ne’e mak sira hahu fo formasaun basiku ba trinadores klubu nian hamutuk 43 no arbitu nain 9 ne’ebé hanorin husi Treinador Indonesia, hodi nune’e sira bele partisipa no organiza liga ne’e ho diak,”dehan Rui ba Jornalsita BT iha edifisiu Ginasiu GMT Dili semana liu ba.

Nia sublina, iha liga ne’e rasik sei partisipa huis klubus hamutuk 11 kompostu husi feto 11 no mane 11, i klubu sira ne’e mak hanesan, União, AS. Ponta Leste, WilKats, AD.SLB, Academia, Benfica, Kaesadante, DIT, Salazar, Cita Mares, Ultramar., i kada klubu maizumenus 20 pessoas,imforma Presidente ne’e.

“liga ne’e rasik ami sei halao iha Jinasiu GMT, tanba kondisaun fatin atu realiza eventu ne’e mak ida ne’e deit, tanba ne’e ami tenki realiza dunik iha ne’e, i liga ne’e rasik sei halao ho durasaun fulan 9, i ba jogu permeiru ami seidauk utiliza bilete, maibe depois de fulan tolu ami foin estabele hodi utiliza fan bilete ba adeptus sira ne’ebé mai asisti iha liga refere”tenik Rui.

Iha liga ne’e rasik parte komisaun hari’i ona komisaun ida para hodi halo selesaun ba jogador nasional hodi prepara ba futuru, tuir kriteria ne’ebé komisaun termina! tanba ne’e iha selesaun ne’e rasik komisaun sei la uja ema estrangeirus, maibe puru timoroan. Nia mos realsa katak, parte komisaun liga anunsiu ona ba klubu sira hotu katak, la bele utiliza sponsor ne’ebé mai husi fabrika alkohol no sigaru, tanba komisaun sei la simu ida ne’e, tanba sigaru ho alkohol sei estraga jogador sira nia talentu iha futuru,deklara Rui.

Iha fatin hanesan Sekretaria Geral LNBTL Izildo Tilman sublinha katak, kriteira ba klubus sira mai rejista iha liga ne’e mak, primeiru tenki sai membru ba federasaun, hodi nune’e sira iha obrigasaun hodi selu kouta ba federasaun kada tinan ho $100.00, no selu lisensa ba jogador no treinador, ne’ebé kada ema ida tinan ida ho osan $5.00, hodi nune’e sira bele partisipa iha liga ne’e rasik.

“se klubu ne’ebé mak la selu kouta sira ne’e, nia sei la bele partisipa iha liga ne’e rasik, tanba ida ne’e mak kriteria husi federasaun nian ba klubu, hodi nune’e federasaun bele fasilita treinamentu ba klubus sira, para bele hetan kualidade diak iha liga ne’e rasik”tenik Ezildo. Entertantu iha parte hanesan Presidente Komisaun Organizadora LNBTL Florindo Pereira hatutan katak, iha liga ne’e rasik parte komisaun sei komvida estudante husi universidade no sekundaria hamutuk 400 ital pessoas, hodi nune’e sira bele imvolve direita iha eventu ne’e, para bele termotivasi iha basketbal. (BT)