DILI----Ekipa Ribeiro Maloa Fc konsege sai hanesan kampiaun ba eventu Ailok-Laran Cup II hafoin halakon Tasi Tolu Fc ho derota 2-1. Jogu amizade entre bairro ba bairro, ne’ebé mak organija husi joventude Ailok-Laran atrai tebes komunidade sira hodi asisti tanba ekipa sira hatudu jogu ne’ebé furak.

Liu husi tekniku no talentu ne’ebé kada jogador iha, halo adeptus sira nunka senti kolen atu hakilar ba sira. Iha jogu primeiru parte ekipa rua halo atrasaun fiziku ne’ebé maka’as ba malu, hodi defende ida-idak nian ekipa, maibe jogador sira nafatin hatudu espritu desportu ne’ebé mak di’ak iha kampu laran.

Maibe ho esforsu ne’ebé mak ekipa rua ne’e hatudu, sorti ne’e monu los iha ekipa Ribeiro Maloa nia liman hodi marka penalti ba baliza Tasi Tolu Fc, i iha penalti ne’e hetan tiru husi jogador Filipe (13), maibe bola ne’ebé nia suta la konsege tama, tanba konsege salva husi guarda rede Tasi Tolu Fc hodi halo derota nafatin ho 0-0.

La espera liu minutu hirak de’it avansadu husi Ribeiro Maloa Fc ho naran Abati (10), konsege kruja bola furak ne’ebé mak la konsege salva husi guarda rede Tasi Tolu Fc iha munutu 40, hodi halo derota nakfila ba 1-0 to jogu primeiru parte remata.

Depois hakat ba segundu parte ekipa Tasi Tolu Fc komesa muda estratejia jogu hodi halo sira nian jogu moris liu tan, no halo jogador Ribeiro Maloa mos kaer la hetan, ho oportunidade ne’e avansadu Tasi Tolu Fc ho naran João (7) konsege ultrapasa kedan golu ida ba fali guarda rede Maloa Fc iha minutu 63, hodi halo derota mudansa ba 1-1, maibe foin hakat liu minutu 5 jogador Ari (9) hatama fali golu ida ba Tasi Tolu Fc nia guarda rede hodi halo derota muda ba 2-1., husi derota ne’ebé mak sai determina ba Ribeiro Maloa Fc hodi sai kampiaun ba eventu Ailok Laran Cup II 2016.

Entertantu iha eventu ne’e ekipa Ribeiro Maloa Fc mak sai hanesan kampiaun hodi hetan piala 1 ho osan $750.00, segundu lugar hetan husi Tasi Tolu Fc ho piala 1 no osan $450.00 no terseiru lugar rezulta husi ekipa Bemori Fc hodi hetan piala1 no osan $300.00, no melhor markador hetan mos husi jogador Jeroni Ximenes husi Bemori Fc ho valor osan $75.00.

Entertantu iha parte seluk iha eventu ne’e komisaun organizadora mos prepara hela premiu ba melhor adeptus ne’ebé mak hetan husi João Baptista ho premiu $25.00, no Jaimito Araujo ho valor premiu $25.00. eventu ne’e rasik hetan apoiu masimu husi kompañia Dellos ho total orsamentu $2,500.00 la inklui vevidas no bee ne’ebé durante ne’e ofrese ba jogador no komisaun sira.

Entertantu iha biban ne’e reprezentante Joventude Ailok-Laran intrega mos dezeñu ida ho marka eventu Aolik-Laran Cup II ba Direktór kompañia Dellos no iha eventu ne’e hetan mos partisipasaun husi Segundu Komandante PNTL Faustino da Costa, Direktur Kompañia Dellos, reprezentante xefe Suku Bairro Pite no xefé Juventude Ailok Laran. (BT)