DILI----Federasaun Xadres Timor-Leste (FXTL) realiza permeiru kampionatu internasional (catur) ho tema “liu husi xadres hatoman-an pasensia hodi asegura desizaun ruma ho serteza” ne’ebe hetan partisipasaun husi nasaun Australia no Indoensia no eventu ne’e halao iha  edifisiu Universidade Nasional Timor-Leste (UNTL) durante loron (13-15).

Sekretaria de Estadu Joventude no Desportu (SEJD) Leovegildo da Costa Hornay, senti orgollu tanba atleta timoroan maske ho idade ki’ik maibe bele kompete ona ho ema idade iha eventu refere.

“Primeira vez timor oan halo kompetisaun internasional iha Timor-Leste konaba xadres (catur), iha eventu ne’e atleta timoroan hamutuk nain ne’en mak sei kompete ho atleta husi nasaun Australia no Indonesia,  atleta sira ne’e federasaun prepara durante  fulan ida i ohin loron sira konsege kompete ho diak hodi hatudu rejultadu positivu” dehan Presidente Federasaun Xadres Timor Leste (FXTL) Zeferino Viegas Tilman.

Nia hatutan,sira ne’ebe hetan impata sei iha pontu tanba tama  ba kategori ho pontu ne’e mak  sei halo sira joga bebeik  hodi hetan klasifikasaun diak atu hetan pontu bo’ot, tanba ho pontu bo’ot mak bele lori sira ba kandidatu Master  no Grand Master,”esplika Zeferino.

Zeferino sublinha, federasaun xadres sei realiza eventu importante tolu, ida mak kompetisaun nasional realiza ona, segundu  kompetisaun internasional xadres, terseiru mak sei halo seminariu konaba atbitrazem internasional iha dili dia (10-12/12).

“los-los iha eventu ne’e nasaun tolu mak sei partisipa iha eventu ne’e kompostu husi,  Indonesia, Filipina no Australia, maibe agora nasaun rua deit mak partisipa hanesan Indonesia no Australia, I Filipina la konsege mai tanba sira iha atividade seluk relasiona ho kalendariu Fide ni-nian”imforma Presidente FXTL ba Jornalista BT iha abertura permeiru kampionatu internasional xadres iha edifisiu UNTL, sesta-feira (13/11). 

Entertantu eventu ne’e hetan apoiu orsamentu husi SEJD ho montante $15 mill I husi orsamentu refere FXTL sei fahe rua, ne’ebe ho montante $6 mill uja ba eventu internasional xadres no $9 mill uja ba seminariu arbitrazem. (BT)