DILI----Partisipasaun Atleta Pra-Junior Taekwondo husi Dojang Dragon UNTL hamutuk ho Dojang Aileu iha eventu UTI-Pro NTT konsege hatudu rejultadu diak, hodi lori medalia osan mean 7 ho perak 1 liu husi atleta nain 8 hodi mai hatudu ba SEJD no eventu ne’e  halao durante loron rua husi dia (18-19/10).

Treinador Dojang Dragon UNTL Mateus Xavier Soares senti kontenti tanba nia atleta konsege hatudu prestasaun diak hodi rekoila medalia osan mean barak mai Timor-Leste, ne’e dunik nia la haluha hato’o agradese ba familia no inan aman atleta sira nian inklui Sekretaria de Estado sira nia moral, tanba ho sira moral mak ohin loron bele dudu atleta sira bel hetan rejultadu diak. 

Nia hatutan, iha eventu refere atleta nain 8 mak kompete iha ne’eba iha klase rua mak hanesan, fighter ho ponce (jurus)s , i  atleta nain 5 mai husi Dojang Dragon UNTL no nain 3 husi Dojang munisipiu Aileu, kompostu husi feto 3 no mane 5, Inklui ofisial 1 ho treinador nain 2,”dehan Mateus ba Jornalista BT iha edifisiu SEJD, kinta-feira (22/10). Iha fatin hanesan Atleta Taekwondo Pra-Junior, Sidonio Soares da Costa Guterres senti kontenti tanba  ho preparasaun limitadu, maibe sira konsege hatudu prestasaun diak hodi foti dignidade Timor-Leste  iha eventu refere.

Entertantu Sekretaria de Estado Joventude no Desportu (SEJD) Leovigildo da Costa Hornai apresia ho rejultadu ne’ebe hetan husi atleta pra-junior taekwondo hodi hamorin Timor-Leste nia naran iha Nusa Tengarah Timur (NTT), tanba bele lori medalia osan mean barak mai Timor-Leste, ne’e dunik hanesan Sekretaria de Estado nia sei buka meus oinsa mak bele rejolve defikuldade hotu ne’ebe federasaun ho atleta sira sei imfrenta tuir kbi’it ne’ebe iha, para bele hare’e atleta nia futuru.

Entertantu rejultadu ne’ebe atleta sira kompete hodi hetan kompostu husi nain 7 fighter no nain 1 jurus (ponce) mak hanesan, klase  fighter atleta ho naran David Alex Junior kompete iha  27kg hetan (osan mean 1), zeofania da Costa Pires (osan mean 1) iha  25kg ho kategoria  tinan 7-8, Boaco Bou Ramalho ho 39kg (osan mean 1), Sidonio Soares da Costa Guteres 35kg  (osan mean 1) no Jorge Pedro Pereira kompete iha 44kg ho kategoria  tinan 12-13 (osan mean 1), Aquaria Deolinda (Aileu) ho 31kg kategoria tinan 10-11 (osan mean 1) no atleta Imaculada Conçeição do Carvalho Mendes (Aileu) ho 33kg kategoria tinan 11-12 hetan (medalia Perak 1), entertantu atleta ho klase jurus (ponce) Jeovanio Varelho Martins hetan medalia osan mean 1(Aileu). (BT)