DILI----Confederasaun Desportu Timor-Leste (CDTL) sei hein apoiu orsamentu ho montante $131,000.00 husi Sekretaria Estado Joventude no Desportu (SEJD) hodi fo kapasitasaun ba federasaun 10 iha area Arbitrazen no Treinador. Prezidente Confederasaun Desportu Timor-Leste (CDTL), Higino Trindade bainhira dadalia ho BT iha knua Jinasiu GMT, tersa,  16/06 hatete, orsamentu ne’ebé SEJD atu apoiu ho montante $131,000.00, tuir proposta husi CDTL katak orsamentu ne’e atu fo formasaun ba federasaun 10 hodi tuir formasaun konaba arbitrazen no treinador.

Higino hatutan, kada federasaun sei partisipa membru 15 hodi tuir formasaun refere no  formador sira sei mai husi KONI- Indonesia, tanba hetan ona konkordansia entre CDTL no KONI no formador sira agora prepara hela maibe  CDTL sei hein hela orsamentu refere husi SEJD hodi realiza  formasaun, tanba orsamentu refere seidauk hetan despaisu husi SEJD, entertantu formasaun ne’e sei realiza iha Timor-Leste no CDTL rasik mak sei organija. 

Nia esplika, iha formasaun ne’e federasaun 10 sei fahe ba area rua, ne’ebé husi parte arbitrazen hamutuk federasaun 7 no treinador hamutuk federasaun 6, kompostu husi federasaun Taekwondo, Basketbal, Atletizmu, Boxing, Volibal no Ciclizmu iha area treinador, iha parte arbitrazen kompostu husi federasaun Badminton, Basketbal, Futebal, Karate, Volibal, Xadres no Taekwondo.

Entertantu iha parte seluk Higino hatutan, iha tinan 2015 CDTL hetan apoiu fundus operasional husi SEJD ho montante orsamentu $. 130,000.00 , ne’e dunik orsamentu refere CDTL uja ba selu funsionariu CDTL no fo apoiu administrasaun ba fokal point CDTL iha munisipiu inklui propoin ba administasaun CDTL central rasik. (BT)