DILI----Sekretaria de Estado Joventude no Desportu (SEJD) Leovigildo da Costa Hornai halo vizita ba Confederasaun Desportu Timor-Leste (CDTL) ho Comite Olimpic Nasional Timor-Leste (CONTL) hodi rona preparasaun atleta sira nian antes desloka ba eventu Internasional Sea Games Singapura no vizita ne’e halao iha loron sesta, (22/05).

Presidente CDTL Higino Trindade iha vizita refere husu ba Sekretaria de Estado Joventude e Desportu (SEJD) atu aprova lalais orsamentu ne’ebe federasaun sira hato’o ona proposta hodi realiza aktividade federasaun nian, tanba to’o agora seidauk hetan aprova! hodi fo impaktu ba aktividade federsaun nian tuir kalendariu ne’ebe determina ona.   

Hatan ba ida Sekretaria de Estado Joventude e Desportu (SEJD) Leovigildo da Costa Hornai hatete, proposta sira ne’e aprova ona hein deit departementu finansas  hodi halo despashu ba banku para osan ne’e bele sai, hodi federasaun sira bele realiza aktividade.

Iha fatin hanesan relasiona preparasaun Sea Games Vise Presidente CONTL Mateus da Cruz imforma ba Sekretaria de Estado katak, naran delegasaun ne’ebe atu ba partisipa eventu Internasional Sea Games Singapura ne’ebe antes tama ona mai CONTL la bele atu truka fali ho naran seluk, tanba naran ne’e desloka ona ba Singapura! Maibe ba naran ne’ebe husi parte membrus governu seluk ida ne’e kompetensia Ministeriu Negosio Estrangeirus, tanba ida ne’e komvida entre nasaun!  CONTL so responsavel ba SEJD, CDTL no Federasaun inklui Atleta.

Entertantu Vice CONTL Vicente Oliveira husu atu antes desloka ba Sea Games Singapura tenki fo lai orientasaun ba ofisial no atleta sira, atu nune’e bele hatene regras husi nasaun Singapura nian, hodi  la bele utiliza sasan arbiru iha otel laran, tanba ida ne’e impaktu ba orsamentu.  

Iha fatin hanesan Vice Presidente CDTL Àfranio Xavier Amaral sublinha katak, orsamentu ne’ebe atu fo ba atleta lalika fo uluk maibe atu aranka foin fo atu sira bele uja iha Singapura, tanba dala barak antes atu aranka osan ne’ebe CDTL fo  atleta sira fahe hotu ba familia depois ba ho liman mamuk tanba ida mos istraga espritu vontade atleta nian. (BT)