DILI----Atleta Juventina Napoleão ho Natercia X. Maia lori medalia perak no perungu mai Timor-Leste, husi rejultadu try out ne’ebé federasaun atletizmu halao iha eventu Malaysia Open. Prezidentee Federasaun Atletizmu Timor-Leste (FTA) Àfranio Xavier Amaral hatete, atleta nain lima mak ba halo try out  iha eventu Malaysia Open, kompostu husi mane rua no feto tolu, ida ne’e hanesan sasukat ida molok partisipa iha eventu Internasional Asia Games Singapura, maibe  iha try out ne’e atleta feto  rua konsege hetan rejultadu diak iha eventu Malaysia Open, hodi hetan piala rua iha eskada segundu lugar no terseiru lugar ho distansia 10,000m kompostu husi nain hitu.

Àfranio hatutan, agora federasaun bele halo ona komparasaun tanba hela fulan rua hodi partisipa iha eventu Internasional Asia Games Singapura,ne’e dunik atleta sira persija treinu makas liu tan ho kondisaun ne’ebé iha, atu nune’e bele realiza timor oan hotu nia mehi. Atleta nain lima kompostu husi, Ribeiro P. De Carvalho, Domingos Savio, Nelia Martins, no Juventina Napoleão hetan rejultadu hanesan segundu lugar no Natercia X. Maia terseiru lugar hodi hetan piala ida iha eventu Malaysia Open.

Entertantu atleta Juventina Napoleão ne’ebé sai hanesan segundu lugar iha eventu Malaysia Open hatete, nia senti kontenti tanba ho preparasaun ne’ebé limitadu mais,  nia konsege hetan rejultadu diak hodi lori medalia ida mai hatudu ba Governu inklui povo timor, ne’e dunik ho ida nia sei kontinua esforsu treinu atu nune’e bele hetan permeiru lugar iha eventu seluk. 

Iha fatin hanesan Sekretaria de Estado Joventude e Desportu (SEJD), Leovigildo da Costa Hornai hatete, nia ba vizita federasaun, CDTL inklui asosiasaun hotu-hotu laos atu hatudu katak sira halo aktividade dunik, mais sira mai atu hatete katak kualker rejultadu saida mak atleta sira hetan iha aktividade ne’ebé, tantu manan ou lakon hanesan federasaun no SEJD inklui asosiasaun tenki komprimitivu atu simu atleta sira ho liberdade no obrigasaun a’as tebes, tanba jogu ne’e la hotu deit ba sira ne’ebé lakon, maibe jogu ne’e sei kontinua dezenvolve nafatin, ne’e dunik nia hanoin buat ne’ebé persija tenki hadia lalais mak Politika Nasional Dezenvolvimentu.  

“Ami apresia ho kongratula tebes ba esforsu bo’ot ne’ebé hatudu husi atleta sira, no aseita ho hanoin barak ne’ebé mak iha katak, ami laos hare’e deit orsamentu ba pembinaan mais oinsa atu hare’e mos diretu atleta sira nian, “mais hau lakoi pormete” proxemplu diretu ba atleta nia skill atu nune’e sira la bele lakon sira nia estudu tanba deit imvolve iha kualker eventu, ne’e dunik SEJD sei kria planu  ida hodi halo akordu ho eskola refere atu nune’e atleta sira nia estudu la bele lakon iha futuru, atu nune’e inan aman sira sei la duvidas atu ofrese sira nia oan hodi partisipa iha kualker aktividade desportu, i konserteza ita sei hadia uluk buat ki’ik hodi nune’e bele realiza mehi ne’ebé a’as, ne’e dunik ita hotu tenki badinas atu servisu”esplika Leo iha diskursu edifisiu FTA jinasiu GMT, tersa (31/03).

Leo hatutan, SEJD prontu atu loke a’an hodi halo diskusaun ho parte hotu-hotu, atu nune’e bele hadia buat ne’ebé la iha benefisiu, no SEJD prontu simu kritika ho espresaun husi parte hotu-hotu, hodi  dezenvolve federasaun no atleta sira diak liu tan, ne’e dunik Sekretaria de Estado husu ba atleta sira tenki kuidadu a’an. Entertantu iha biban ne’e mos Sekretaria de Estado ba hare’e dereitamente konaba preprasaun treinu ne’ebé halao husi atleta Federasaun Silat Timor-Leste  iha jinasiu GMT, hodi hatene tuir atleta sira nia preparasaun agora to iha ne’ebé, antes ba partisipa iha eventu Internasional Asia Games Singapura. (BT)