DILI----Kompañia telekomunikasaun Timor Telekom (TT) aprejenta atleta  siklista nain 4 ne’ebe elit no marka tan istoria ida hodi asina nota de intendementu (MOU) ho Federasaun Siklismu Timor Leste (FSTL). Atleta elite TT nian ne’e mak hanesan, Zefemia Santos Babo, Atleta modalidade BMX ho idade 18, David Spirito Santo Morais, atleta BMX ho idade 17, Sebastião Domingos Ximenes Belo atleta modalidade MTB ho Idade 17, Henrique Horta atleta modalidade MTB ho idade 16.

“Ida ne’e potensi timor nian. Timor Telekom hakarak aprejenta ba sua exelesia sekretariu estadu katak sira ne’e mak atleta elit ne’ebe hetan tulun husi Timor Telekom, maibe liu husi Federasaun siklismu tanba tenki ser iha organizasaun iha mahun ida mak bele kaer sira nia vida hanesan atleta siklista,” Diretor diresaun Relasaun Institusionais Timor Telekom, Manuel Carseles da Costa informa liu husi konferensia imprensa ba Jornalista sira  iha salan konferensia Timor Telekom iha Timor Plaza seman liu ba.

Nia dehan ajuda ne’ebe TT fo ba federasaun siklismu ne’e atu tulun atleta nain hat ne’e ho osan montante 16 mil dolares nune’e mos hetan osan pulsa $ 600. Nia esplika pulsa ne’e intrega ba iha federasaun mak federasaun ho sira halo kontaktu ba malu para ajuda sira hodi nune’e komumikasaun bele lao diak. “Intesaun atu ajuda atleta elit sira ne’e hanesan fo motivasaun ida atu atria tan jovem sira seluk ne’ebe bele konkore ho sira hodi bele aumenta tan numeru atleta siklismu nian iha Timor-Leste tantu feto ka mane,” Carseles Esplika. Nia dehan kompetisaun ohin loron laos iha rai laran deit maibe iha mos rai liur tanba ne’e nia fo parabens ba federasaun siklismu tanba bele jere duni tulun ne’ebe sira hetan hodi uja ba iha siklismu.

Nia haktuir iha tinan 2013 atleta timoroan hetan primeiru lugar iha eventu  internasional MTB Bali Biking, Indonesi, premeiru lugar ba tasa da paz,  premeiru lugar ba kampionatu nasional no hetan pozisaun diak ranking internasional Timor-Leste hetan fatin diak liu husi siklista sira. “Ita hein katak ita nia alin feto ne’e mos hatudu prestasaun diak no bele hetan prestasaun diak iha tinan 2015 ne’e, jovem atletas nai 4 lalika hare ba valor nominal osan nian bo’ot ka ki’ik,” dehantan nia. Entretantu Sekretariu Estadu Joventude Desportu (SEJD), Leovijildo Hornai esplika iha VI governu kostitusional liliu Sekretariu estadu Joventude no Desportu nia politika mak Trilateral. 

Eis  Prejindente Conselu Nasional  Joventudi Timor Leste (CNJTL) ne’e esplika klean liu tan konaba politika trilateral ne’e katak Governu, federasaun no terseira parte mak investor ka parseiru tanba dezemvolvimentu desportu ne’e labele governu mak hasai buat hothotu, maibe governu bele halo politika governu bele regularija prosesu tomak para atu garante partisipasaun prinsipiu trilateral. “Hau nia mehi mak ida ne’e katak tersa 10/03 semana liu ba proba duni husi Timor Telekom atu fasilita federasaun no mos pesoal atleta sira ne’ebe ho prestasaun diak, titular ás politika ida ne’e iha koerensia ho politika VI governu Konstitusional, ne’e duni parabens ba Timor Telekom,” katak Leo

Nia haktuir Molok atu asumi kargu hanesan sekretariu estadu antes ne’e primeiru ministru sesante ho atual primeiru ministru hatete ba nia katak buka atu habelun diak liu ho parseiru ho sentidu ida la iha interferensia ba buat ne’ebe mak prinsipal ba buat ne’ebe mak fundamental, maibe parseiru ne’e importante iha dezemvolvimentu desportu. Leo mos lori VI governu konstitusional nia naran fo apresisaun  no agradese wain ba Timor Telekom, liliu prezidente Timor Telekom ho nia estrutura tomak. Nia ekoraja nafatin katak importante mak prinsipiu hat ne’ebe temi ona iha leten no buaka enkoraja nafatin aktividades ne’e labele para ho apoio ne’ebe iha maibe buka nafatin atu iha sustentabilidade. 

“Hau iha memoria uituan katak Timor Telekom, Laos deit apoiu FSTL, maibe Timor Telekom apoiu ba federasaun oioin ka asosiasaun oioin inklui individu iha Timor Leste, ne’ebe ami tenki reafirma ami nia pozisaun no ami tenki rekuinese ida ne’e hanesan kontribuisaun ida ne’ebe importante tebes ba iha dezemvolvimentu desportu jeral,” dehan nia. Governante ne’e mos sente katak tessa 10/03 semana liu ba sai hanesan loron ne’ebe fantastiku tebes ba nia tanba tuir nia ida ne’e hanesan esforsu ida ba dezemvolvimentu ne’ebe ita konsidera importante no hau husu TT atu halo tan expensaun uituan ba atletas federasaun sira ne’ebe mak preinse rekejitu bele apoiu nafatin.

“Ami governu prontu atu apoiu no mos bele fasilita saida mak ami bele tanba foin lalais ne’e iha Timor Telekom halo ona memorandu ho Siklismu ba oin iha tan atletismu espera ida ne’e bele akontese no ida ne’e  honra bo’ot ida ba Timor Telekom ho Governu Timor Leste,” dehan nia. Enkuantu rezultadu ne’ebe iha hafoin Timor Telekom apoiu ba federasaun siklismu mak, iha tinan 2014 atleta timoroan mos partisipa iha tour Vietnam nian no haruka siklista nain 4 ba, kampionatu Asiatiku Road iha Cazaquistão, haruka siklista 1 ba Bali Biking Challenge iha Indonesia, haruka siklista nain 6 ba Jogus Asiatiku iha Korea do Sul.

Alende ne’e haruka mos atleta sira ba partisipa kampionatu mundial Tack Junior iha Korea do Sul, haruka siklista nain 2 ba Langkaw Internasional MTB Challege iha Malasya haruka sikliata nain 4 ba Kampionatu Asiatikcos MTB iha Indonesia, haruka siklista nain 2 ba, Kampionato Asiatiku  iha Indonesia haruka siklista nain 2 ba ikusliu mak Tour de Khaturistiwa, iha Indonesia. (BT)