DILI-Sekretariu Exekutivu Confederasaun Desportu Timor-Leste (CDTL) Fredelinho Gama Soares hatete atleta sira ne’ebé ba tuir eventu Asia Games Korea la’os tenki manan ka lakon maibe CDTL rasik espera katak atleta sira tenki hatudu jogu ida ne’ebe diak iha kompetisaun nia laran. “Ida  ne’e mak  konseitu ne’ebe  durante Confederasaun Desportu Timor-Leste  uza,” dehan Sekretariu Exekutivu CDTL ne’e ba jornalista BT iha edifisiu Jinaziu GMT, segunda (15/09).

Nia hatutan, maske ho federasaun hotu  nia fasilidade menus tebes hodi fo treinu ba atleta maibe kada federasaun ida- idak sempre esforsu an hodi fo treinu ba atleta sira ho masimu ba preparasaun eventu Asia Games Korea. Fredelinho deklara katak sira hotu sei garantia malu katak federasaun hotu-hotu sei fo rezultadu diak. “Federasaun sei la dehan atleta sira tenki menan  ou lakon maibe importante mak atleta sira hatudu ba nasaun hotu katak Timor-Leste mos sei hatudu jogu ne’ebe diak,” nia hatete.

Entertantu total atleta no treinador husi federasaun modalidade  walu hamutuk rua nulu resin ida (21) mak sei partisipa iha eventu Asia Games Incheon Korea, la inklui futbol. Total atleta hamutuk sanulu resin tolu (13)  total treinador hamutuk nain walu (8). Sekretariu Jeral Federasaun Karate Timor-Leste (FEKATIL) Antonio Carlos de Araujo hatete, husi FEKATIL sei garante atleta karate-do sei hatudu prestasaun diak iha eventu Asia Games Incheon Korea. FEKATIL delega atleta nain rua ho naran, Jaime Godinho Soares ho klase min- 55 no Teodoro Saturnino Koli ho klase min- 60, inklui treinador nain ida ho naran Filomeno Soares de Araujo hodi partisipa eventu internasional ne’e.

Entertantu Prezidenti Federasaun Ciclismu Timor-Leste (FCTL) Angelo ho fiar an hatete, iha parte federasaun sei garante nafatin katak atleta siklismu sei halo  buat ruma iha Asia Games Incheon Korea. Nia  hatutan,  konaba preparasaun treinu ba atleta siklismu laos programadu maibe atleta siklismu sira ne’e programadu tia ona. Siklismu nasional sei lafalta treinu se falta treinu wainhira atleta ne’e hetan moras, dehan Angelo ba Jornalista BT wainhira hasoru malu iha jinasiu GMT segunda (15/09). Angelo esplika, atleta siklismu laos foin mak atu treinu hodi prepara ba Asia Games Incheon Korea maibe sempre treinu lor-loron. Ne’e duni wainhira konvite mai husi eventu internasional atleta sira sempre prontu atu partisipa.

Nia reafirma, atu tuir eventu internasional federasaun siklismu iha kriteria barak ba  siclista nasional  tenki tuir. Federasaun tenki halo seleksaun ba atleta ida ne’ebe diak liu nia mak tenki ba tuir eventu refere. Angelo sublinha, Depois mos ciclismu sira tenki tuir atestado mediku tanba saude importante tebes para asegura atleta sira, liu-liu hodi tuir eventu internasional. FCTL delega atleta nain rua ho naran Noelio Antonio P. Reis ho Antonio Fernandes Viana inklui treinador ho naran, Nelson Ricardo D. Lemos. Atleta siklismu nain rua sei tuir eventu ho 100 km ba modalidade roll bike ho monta bike. Iha fatin hanesan Prezidenti Federasaun Atletismu Timor-Leste (FTA) Afrânio Xavier Amaral informa, importante mak ita nia tempu preparasaun ba atletismu sira nia kondisaun.

“Atletismu nia kondisaun diak hau garante katak atletismu sira sei partisipa ho diak,” dehan Afrânio ba Jornalista BT iha edifisiu jinasiu GMT segunda semana liu ba (01/09). FTA delega atletismu nain rua ho naran, Samuel Marçal dos Santos halai ho 800 meter entertantu  Marquita dos Santos halai ho 1500 meter- ½ km inklui treinador ho naran, Antonio da Costa hodi partisipa eventu asea games Incheon Korea. Entertantu Federasaun Volibol Timor-Leste (FVBTL) delega atleta nain rua ho naran, Adriano da Ressureição Correia ho Gaudencio Duarte Fernandes Xavier ho tuir kompetisaun praia, iha Asia Games Incheon Korea inklui treinador, Nicolau Duarte Fernandes Xavier.

Federasaun Taekwondo Timor-Leste (FTTL) delega atleta nain rua partisipa asea games Incheon Korea, ho naran, Luisa dos Santos Rosa ho Klase sim 45, Aida de Jesus Lemos ho klase play 54 inklui treinador Lee Jaeoh. Federasaun Boxing Timor-Leste (FBTL) delega boxista nain rua ho naran, Leonel Parada Helo ho  Elio Jenoveva Edito da Silva inklui treinador nainrua, Fortunatu Soares ho Rogorio Amaral Soares. Federasaun Weighlifting Timor-Leste (FWTL) mos delega atleta nain ida hodi partisipa eventu asea games Incheon Korea ho naran, Gilton Fatima G. Da Costa inklui treinador, Pedro do Rego.

Federasaun Footbal Timor-Leste (FFTL) delega jogadores  sub-23 ho total 20 inklui treinador nain 5. Naran jogadores sub-23, Ramos S.Ribeiro Maxanches, Julião Monteiro, Ricardo Sousa da Cruz Maia, Marcos Morais Gusmão, Eusebio Pereira, Filipe Oliveira, Paulo Martins, Agostinho da Silva Araujo, Carlos Jovanio C. de A. Magno, Olegario B. H. P. Boavida, Candido M. de Oliveira, Anggisu Correia de A. Barbosa,  Adelino T. Coelho M. de Oliveira, Nataniel de Jesus Reis, Ezaquiel dos Santos Fernandes, Jorge Sabas Victor, Diego Santos Rangel, Filipe Bertodlo dos Santos, Jose Guterres Silva. Naran treinador, Antonio Carlos Veira, Manuel da Silva, Manuel Alves Pinheiro Filho, Nurkholis, Alexandre das Dores Vong Seran. (BT)