DÍLI----Relasiona ho publiku balun deskonfia manu-tolun balun falsu (Plastiku) iha tinan kotuk, Ekipa Operasaun Autoridade Inspeksaun no Fiskalizasaun Atividade Ekonomika Sanitariu no Alimentar, Instituto Públiku (AIFAESA,IP) Hamutuk ho Ministeriu Saude (MS), no Diresaun Diagnóstika Veterinária husi Ministeriu Agrikultura no Peskas (MAP) halo komferensia pers hodi aprezenta resultadu teste amostra manu-tolun iha laboratórium ne’ebé ho resultadu negative no la hatudu indikasaun iha material plastiku.

Tan ne’e, Ekipa Realiza Konferénsia Imprensa, hodi Aprezenta Rezultadu Teste manu-tolun ba Públiku katak relasiona ho reklamasaun husi komunidade kona-ba manu-tolun ne'ebé deskonfia falsu, mak iha fulan Outubru tinan 2019 tanba ne’e ohin ekipa fó sai resultadu.

Tuir Koordenadór AIFAESA Abílio Oliveira Sereno heteten Ohin AIFAESA Hamutuk ho Laboratóriu Diagnóstika Veterinária (MAP), ekipa husi AIFAESA diretamente ba foti amostra iha empreza produtór sira hanesan, empreza Grasia Farm Lda, ne'ebé lokaliza iha Railaku Munisípiu Ermera no empreza Happy Farm Lda, iha Loes Munisípiu Likisá. Hafoin foti amostra manu-tolun refere halo análiza katak rezultadu manu-tolun hirak ne'e laiha risku falsifikadu, maibé iha kestaun mak konservasaun iha distributór sira mak la tuir temperatura ne'ebé los.

Iha konferénsia ne'e, Maske AIFAESA laiha laboratóriu, maibé AIFAESA liuhusi Departamentu Planeamentu Operasional Risku Alimentár Laboratórium (DPORAL) iha servisu koordenasaun ho instituisaun sira ne'ebé iha laboratóriu, hanesan Ministériu Saúde no Ministériu Agrikultura no Peska, hodi bele hatán ba preokupasaun públiku liuhusi teste no teste ida nemós bazeia ba reklamasaun komunidade sira ba empreza lokal balun.

“Ami halo kolleta ba amostra husi empreza produsaun manu-tolun iha postu Administrativu Railako (Ermera) nomós empreza produsaun ida tan Postu Administrativa Loes (Likisa) hodi hatene kle’an kona-ba situasaun manu-tolun ne’ebé tuir Reklamasaun komunidade sira katak falsu maibe resultadu halo teste laindika material falsu ida laiha risku falsifikadu” hateten Koordenadór AIFAESA Abílio Oliveira Sereno liuhusi konferensia imprensa iha salaun AIFAESA Mataduro, Kinta (12/03).

Ne’e Dunik, Resultadu ne’ebé mak iha no rezultadu análiza laboratóriu ne'e laiha katak konkluzaun manu-tolun la indika falsu. “Signifika hafoin halo analiza laboratórium ba amostra manu-tolun ne’ebé ami ekipa foti lahatudu katak empreza sira fa’an manu-tolun ne’e falsifikadu (plastiku),” afirma nia. Nune'e Diretór Departamentu Planeamentu Operasaun Risku Aihan no Laboratóriu (DPORAL) Ângelo Edmundo Belo, subliña, rezultadu análiza laboratóriu ne'e la heteten manu-tolun falsu ka plástiku.

Nia hatutan, Amostra ne’ebé mak parte laboratórium diagnóstika halo bazeia ba sasukat hanesan haree liuba nia kualidade no seguransa rasik inklui kontaminasaun balun husi manu-tolun ne’e rasik. “Nune’e bainhira ita atu hatene ba manu-tolun plastiku no falsu haree husi manu-tolun nia kualidade kulit, manu-tolun mutin no manu-tolun kinur,” katak nia.

Iha sorin seluk Xefe Departamentu Laboratóriu Diagnóstika Veterária Felisiano da Conceição haktuir tan, rezultadu manu-tolun hirak ne'e laiha risku falsifikadu, maibé iha kestaun mak konservasaun iha distributór sira mak latuir temperatura ne'ebé los tanba ha’u (Felisiano da Conceição) ha’u-nia papel hanesan halo Diagnóstika ba manu-tolun no fó sai resultadu.

Aleinde ne’e, Iha tinan kotuk 2019 AIFAESA servisu hamutuk ho instituisaun sira ne'ebé iha laboratóriu, hanesan MS no MAP halo inspesaun ba manu-tolun ne’ebé mai husi Kompañia Grasia Farm nomós kompañia Happy Farm tanba iha reklamasaun husi populasaun katak manu-tolun ne’ebé mak empreza rua ne’e produz plastiku. “Maibe Hafoin ami halo inspesaun tuir estandarte ne’ebé mak Nasaun barak aplika iha laboratórium hatudu katak manu-tolun ne’ebé ita produz iha rai laran laindika falsu.

Alende ne’e momentu ne’eba ami halo mós teste ba iha kontaminasaun no ami hao analiza batérriu la indika katak manu-tolun ne’e kantaminadu falsu (plastiku),” esplika Felisiano. Nune’e Felisiano Rekomenda ba produtór sira bainhira distribui ba empreza (Distribuitór) sira tenke hatene jere ho diak. “Kona-ba problema hanesan ne’e distribuiór sira mak tenke hatene jere atu rai manu-tolun ne’e iha temperature ne’ebé mak diak.

Nune’e bainhira hare kualidade manu-tolun atu diak ka lae, kolega Distribuitór sira mak hatene tanba tuir rekomendasaun sientifiku katak tenke rai manu-tolun iha temperature 300” Informa nia. Ne’e dunik, Nia mós husu ba populasaun (Komunidade) sira kuandu hetan manu-tolun laiha kualidade tenke lalais informa ba AIFAESA, nune’e bele haruka ekipa tun hodi foti amostra lori ba teste tanba kestaun ne’e bele afeita ba ema-nia vida humanu liliu ba seguansa aihan.

Entretantu, Koordenadór Jéral AIFAESA Abílio Oliveira Sereno kontinua haktuir tan, Husu ba públiku atu kontinua koopera ho AIFAESA,IP karik ba loja mak hetan manu-tolun laiha kualidade no haree hanesan plástiku tenke informa ba autoridade ne’ebé besik hodi informa ba ekipa ne’e tun no lori amostra ba teste hodi hatene lolos resultadu aihan refere.

“Ami ba oin kontinua koopera ho intituisaun relevante sira ne’ebé mak iha Laboratórium atu kontinua hare ba kestaun sira hanesan ne’e, tanba ne’e husu ba públiku lalika paniku kuandu hetan produto laiha kualidade tenke reklama lalais mai AIFAESA atu halo intervensaun,” Informa nia. (BT)