DÍLI----Lalenok Ba Ema Hotu (LABEH) fó graduasaun ba labarik sira ne’ebe durante ne’e eskola iha Eskola LABEH liu-liu iha Kindergarten School hamtuk ema nain-11. LABEH nia objetivu hodi loke eskola Kindergarten School ho nia objetivu mak oinsa tulun labarik sira nia konesementu ba iha area edukasaun formal.

Tuir Diretor ezekutivu Lalenok Ba Ema Hotu (LABEH) Christopher Henry Samson, hatete katak LABEH fó graduasaun ba estudante kiikoan sira ba dala IV hamutuk ema nain-11, tanba LABEH nia espasu atu simu estudante limitadu, tanba ne’e mak LABEH simu oituan deit no tinan ida ne’e LABEH simu deit estudante nain-11 maibé ida seluk la kontinua.

“Ohin fó graduasaun ba estudante kiikoan sira ne’bé ba dala IV ba estudante nain-11, tanba iha Lalenok Ba Ema Hotu ita nia espasu atu simu estudante limitadu, tanba ne’e mak ita simu oituan deit no tinan ida ne’e iha estudante ami simu deit nain-12 maibé ida seluk la kontinua. Tanba ne’e mak nain-11 mak ohin hetan graduasaun,” dehan Dr. Christopher Henry Samson ba jornalista sira iha salaun LABEH Comoro, Kampung-Baru, Dili, Sabadu (21/12/2019).

Nia hatutan, LABEH nia Kindergarten laiha diferensia ho sistema hosi eskola sira seluk. “LABEH nia kindergarten nia laiha diferensia ho sistema hosi eskola sira seluk, maibé inportante ba LABEH mak atu oinsa bele hakbesik an hatete katak kada estudante hetan atensaun maximu hosi ninia profesor no profesora”

Nia dehan tan, depois ita nia lingua dahuluk ne’ebé ita uza hodi hanorin sira mak lingua Ingles, tanba ita hakarak komesa hosi kiik sira hatene ona Ingles, depois mak Portuges, Tetun ho konsensia sira seluk, ida ne’e mak inportante ba iha ne’e.

“Ohin loron estudante sira bele koalia Portuges diak liu no sira koalia Ingles, sira mos koalia Tetun, lingua-3 dadauk ne’e sira aprende iha eskola sira koalia, kuandu lingua materna nian, maibé iha eskola ida ne’e ita hanorin dahuluk mak Ingles, Portuges no Tetun ne’e mak meius ne’ebé sira uza” dehan Christopher

Iha fatin hanesan reprezentante inan aman, Ermelindo Eror, kona-ba graduasaun ohin LABEH fo ona ba estudante sira nu’udar TK ne’e lao ho diak. “Kona-ba graduasaun ohin LABEH fó ba ami nia oan sira nu’udar TK buat ne’e lao ho diak, tanba ami mos hare ami nia oan sira eskola durante tinan-1 nia laran sira aprende buat barak iha eskola ida ne’e,’’ dehan Ermelindo

Nia mos hatutan tan agradese ba LABEH nu’udar reprezentante inan aman motiva eskola ida ne’e bele lao to’o klase-6. “Ami mos agradese ba LABEH ba oin ami nu’udar inan aman ami motiva eskola ida ne’e bele lao to’o klase-6 ida mak ami hato’o ba ita hotu” dehan Ermelindo. (BT)