DÍLI----Orsamentu Sekretáriu Estadu Protesaun Sivíl (SEPS), liuhosi Konsellu Ministru (KM) konsege redús Orsamentu Jerál Estadu (OJE) 2020 kuaze Millaun $3.6, no hosi redusaun ne’e sei afeita ba programa SEPS iha tinan oin. Tuir Sekretáriu Estadu Protesaun Sivíl (SEPS), Alexandrinho Xavier de Araújo hateten, redusaun Orsamentu Jerál Estadu (OJE) prejudika ba planu SEPS iha tinan oin nian,

“Kualker redus OJE, tenki prejuda ba programa nian, tanbá redús mós programa ba tinan oin nian, ba aktividade ne’ebé mak iha labele implementa,“ Dehan (SEPS), Alexandrinho Xavier de Araújo Mensiona ba Jornalista sira iha Palasiu Governu, Kinta-Feira (19/12/2019).

Governante ne’e dehan, prejudika ba programa, tanbá redús orsamentu tinan oin nian, ba atividade ne’ebé mak planu mak hanesan antedimentu ba iha dezastre naturais, inklui ba atividade balun sei labele realize. “Tanbá ne’e, problema mak redús orsamentu bele afeita, dalaruma bele loke uluk iha Munisípiu Ermera no Manatutu, maibé ejijensia mai hosi Povu ne’e hakarak loke edifisiu Bombeirus ne’e tinan ida ne’e, maibe lakonsege tanbá redus OJE,” katak nia.

Nia klarifika liutan, redusaun SEPS nian inisiu Millaun $15, maibé redús fali orsamentu Millaun $3.60, ne’ebé mak iha área hosi kapitál dezenvolvimentu kapitál menór Bens Servisu ho Saláriu Vensimentu. SEPS esplika, tinan 2020 nian atu loke Bombeirus foun iha Munisípiu Ermera ho Manatutu, Kontinua ba tinan 2021 mak atu loke fila-fali iha Munisípiu Likisa ne’e Siknifika Bombeirus iha Timor laran tomák ne’e remata ona.

Nia dehan, atu estabelese edifisiu iha Munisípiu Vikeke, Baukau no Lospalos, maibé orsamentu ne’e redús ona, SEPS hanoin fila-fali ne’ebé mak seí koalia ho Xefí Governu, karik iha orsamentu ruma bele hala’o dadauk iha Munisípiu Vikeke ho Baucau nian, tanbá haré edifisiu iha ne’ebá kuaze at total liu-liu edifísiu Bombeirus nian.

SEPS fiar, seí iha prejudika, maibé esperansa no kontaktu nafátin ho Xefí Governu, karik iha orsamentu ruma ne’ebe mak iha rezerva no kontizensia balun, SEPS hatama de’it dadus atu nune’e bele fó apoiu ba ita nia komunidade sira ne’ebé mak hetan dezastre. Governante ne’e akresenta liutan, atendimentu ba númeru dezastre mak hato’o ba Xefí Governu, ho núneru dezastre ne’ebé mak akontese ida uluk no agora, hamutuk 5600 iha teritóriu Timor laran tomák. (BT)