DĺLI----Helatan fulan ida nasaun tomak nomós Timor-Leste sei selebra loron boot rua hanesan Natal no Tinan Foun ho nune’e Loja W4 sei mantein folin normál ba sasán nesidade báziku sira inklui produtu masin-midar ne’ebé kada tinan atu tama ba loron boot ne’e konsumidór sira sosa ho stock ne’ebé boot.

Supervizora Loja W4 Arminda Fernandes Monteiro hateten tempu selebrasaun Natal no Tinan-Foun besik too ona mai no husi parte Loja W4 sei asegura folin Masin-Midar no normal tanba hare ba esperiénsia katak kada tinan masimidar mak sai produtu ida ne’ebé ema sosa ho kuantidade boot iha loron boot.

“Loja W4 Audian sei prepara masimidar 1000 saka hodi responde ba konsumidór sira nia nesesidade iha fulan Dezembru nia laran. Iha fulan bain-bain loja W4 sempre fa’an Masin-Midar husi saka 200 to’o 300 de’it, maibé tanba ba selebrasaun loron boot Natal no Tinan Foun tenke prepara too saka 1000, atu bele sufisiente ba sosa nain sira.’’ dehan Supervizora Loja W4 Arminda Fernandes Monteiro ba Media Business Timor iha Audian, Kuarta-Feira (13/11/2019).

Maske ba loron boot volume konsumidór aumenta no kuantidade ba Masin-Midar boot maibé loja W4 sei nafatin mantein folin normal husi kada Kg 1 0.75 Sentavu no Kg 5 ho presu $3.50. Maibé iha posilidade halo promosaun hodi hatún folin nu’udar deskontu husi 25%. “Masin-Midar ne’ebé mak oras ne’e prepara ona iha Loja W4 simu husi agen fornesedor rua mak hanesan Lisun no Alfalili. No nia preparasaun sufisiente tebes no garantia katak iha tempu selebrasaun Natal Masin-Midar sei la menus ba konsumidór sira hotu’’ Dehan Arminda

Nia hatete konsumidór sira sempre sente haksolok tanba kada tinan folin Masin-Midar sempre normal no mós konsumidór sira sempre mai sosa iha tempu promosaun nian tanba bele sosa barak no hetan deskontu 25% husi presu normal. “Dezafiu ne’ebé mak karik dala ruma Loja W4 hasoru ba preparasaun Masin-Midar dala ruma hetan atraza husi fornesimentu mai Loja, maibé buat hotu sempre la’o ho di’ak.

Karik iha selebrasaun loron boot Natal no Tinan Foun mak iha parte agente fornesedor Masin-Midar nian hasa’e nia folin maibé iha Loja W4 kompremetidu katak sei la hasa’e Masin-Midar nia folin no nafatin ho presu normál.’’ Nia dehan. Nia informa katak alende husi Masin-Midar iha mós nesesidade báziku sira seluk hanesan Mina, Trigu, Dose no seluk tan ne’ebé mak Loja W4 sei asegura folin normal no mós fó deskontu 25% iha tempu promosaun.

Mensajen espesiál Supervizora Arminda Fernande Monteiro ba konsumidór sira hotu katak, Loja W4 sei garantia folin normal ba Masin-Midar no labele duvida atu hakat mai sosa no mós iha tempu promosaun sei hetan deskontu 25% husi Masin-Midar no mós ba nesesidade báziku hodi festeza hamutuk ho família tomak. (BT)