DĺLI----Nu’udar ema ho defisiénsia nafatin iha inisiativa atu bele hala’o negósiu ki’ik atu bele responde ba nesesidade família no lakohi atu tane-liman ba ema seluk.

Martino Freitas nu’udar ema ho defisiénsia ho idade 29 husi munisípiu Baukau oras ne’e hela ho família iha Delta, Dili, Martino Freitas konsege forma familia (Kaben) ho Maria Da Silva no ohin loron sira iha oan mane rua Sabino tinan 6 no João Freitas tinan 3. 

Maske moris nu’udar ema ho defisiénsia nafatin luta ba moris hodi hala’o atividade negósiu ki’ik hodi fa’an pulsa husi operadór tolu mak hanesan Timor Telecon, Telemor nomós Telkomcel. Martino hateten hala’o atividade negósiu ki’ik ne’e mai husi inisiativa rasik atu oinsá pelumenus hetan netik osan balun atu bele responde ba nesesidade báziku oan no família nian, tanba tuur iha fatin de’it la bele hetan buat ruma.

“Lakohi atu husu beibeik ba ema seluk maski moris ho kondisaun ema ho defisiente, hakarak ka lakohi ita rasik mak tenke servisu hodi buka osan. Loron fa’an pulsa iha Timor Plaza nia odamantan oin ba kliente sira ne’ebé mak ultrapasa ba mai,” haktuir Martino Freitas bainhira dada lia ho Jornalista BT iha Timor Plaza, Kinta-Feira (14/11/2019).

Rendimentu husi fa’an pulsa nee la boot loron ida bele hetan rendimentu $3-4. Pulsa ne’ebé mak fa’an ha’u nian rasik no husu ajuda kolega Joaquin da Silva mak ba sosa iha agen mak mai fó mai ha’u fa’an. Dader tuku 9 ho kadeira roda hahú sai husi uma hodi la’o neneik ba fatin fa’an niain iha Timor Plaza hodi hetan netik lukru ruma husi pulsa ne’eb’e nia fa’an no to’o lorokraik tuku 5 bainhira portaun boot Timor-Plaza nian taka defisiente ne’e mós ho ninia kadeira roda hean ho neneik hodi fila ba ninia hela fatin hodi hein fali ba loron aban nian.

Nia hatete atualmente hetan ona apoiu husi parte governu liu husi programa ministériu sosiál nian hodi simu osan kada fulan 6 dala ida, bele duni responde ba nia nesesidade família nian maibé lori tempu naruk tebes tanba ne’e mak ho inisiativa rasik hakarak hala’o negósiu ki’ik ne’e. “Husi osan simu iha fulan neen dala ida utiliza mós balun hodi sosa pulsa no oras nee pulsa iha hamutuk $500 maibé konsumidór mak menus tebes.’’ Nia haktuir 

Hanesan ema ho defisiénsia husu ba joven sira hotu atu labele baruk hodi involve aan iha atividade negósiu saida de’it tanba liu husi negósiu bele fó lukru ba ema hotu hodi bele responde nesesidade báziku no bele muda moris iha futuru. Tanba moris ne’e se ita la book–aan atu halo buat rua hodi hetan netik buat ruma ita sei lakon leet no ita sei dependénsia deit ba ema seluk. (BT)