DÍLI----Ohin loron Governu, Sosiedade sivil no komunidade balun triste ho hahalok imoral husi Timoroan balun ne’ebé kontinua lakon domin ba iha Ambiente iha Timor-Leste. Timoroan sira lakon Domin ba iha Ambiente Timor-Leste tanba hamosu liman katar hodi sunu rai iha fatin-fatin hanesan Foho Ramelau (Munisipiu Ainaro) sunu Rai iha Ermera, Sunu Foho Matebian, Sunu Rai iha Kablake.

Husi hahalok sira ne’e konsege lori dezastre lubuk ida ba iha Timor nomos Timoroan balun tanba Timor-Leste tenke lakon nia rikeza balun hanesan Animal Fuik, Animal Hakiak, no pior liu mak tenke husik Timoroan balun tenke tur ho matan been tanba lakon sira nia uma barak inklui mos lakon sira nia uma lisan balun.

Husi ema ida ka rua nia hahalok imoral tenke kria servisu todan ba iha entidade hotu tantu Governu, Parlamentu Nasional, Sosiedade Sivil inklui mos Autoridade Lokal sira. Tuir Informasaun ne’ebé BT rekolla husi Parte kompetente sira katak Ohin loron iha Timor-Leste hasoru hela bai Loron no rai maran hodi halo ema balun konsege sunu rai iha fatin-fatin hodi estraga Ambiente iha Timor-Leste, inklui mos balun sunu to’os hodi prepara ba tempu udan.

Hare'e husi problema hirak ne’e sai lisaun ida ba iha Timor-Leste liu-liu instituisaun relevante sira atu oinsá bele kria planu ida ne’e rigoroju hodi halo kontrolu ba iha Sosiedade sira atu nune’e iha futuru labele kontinua hamosu insendiu refere. Tuir kordenadór programa auditorial sosial Luta Hamutuk Augusto Ruas Monteiru hateten katak ohin loron mosu ema sunu rai iha fatin-fatin nudar dezastre ida hodi estraga Ambiente iha Timor-Leste tan ne’e husu ba iha instituisaun no autoridade sira atu seriu hodi rezolve problema refere, inklui autoridade kompetente labele nonok hodi hein rejultadu maibe tenke halo asaun antes hodi antisipa akontesimentu sira.

‘’Atu dehan de’it katak primeiru ita haree hanesan dezastre naturais, tanba governu nia responsabilidade liu-liu ba parlamentu mos halo fiskalizasaun halo levantamentu dadus balun kona-ba insendiu ne’e, Maibé atu hatete katak efeitu ne’e problema ahi han rai ne’e ema nia hahalok ,” dehan nia. Nia esplika katak atu minimiza problema insendiu autoridade no parte relevante tenke seriu atu haree asuntu refere.

“Atu minimiza ba problema insendiu sira hanesan ne’e tenki servisu Autoridade sira no parte relevante ne’e tenki seriu, labele problema insediu mosu mak ita foin hakfodak, tanba insendiu akontese ne’e estraga natureza, estraga kultura, halakon mos ita ema nia vida, hanesan komisaun F sira ba halo fiskalizasaun ahi han hanesan ne’e tanba saida,” katak nia.

Nia klarifika katak insendiu ne’ebé mosu ohin loron lori triste boot ba iha populasaun inklui autoridade sira tanba tenke esforsu oinsá bele rezolve problema ne’ebé mak iha. Ho problema refere nia husu ba iha ministeriu Agrikultura no ministeriu kompetente atu bele haree problema refere tanba problema refere lori dezastre boot iha ba Timor-Leste hanesan, Timor-Leste tenke lakon nia rikusoin hanesan Plantasaun, Animal Protejidu, Animal Hakiak, inklui impaktu mos ba moris populasaun ninian.

Iha biban ne’e mos Organizasaun non Govermental FONTIL Kestiona ezistensia Guarda Floresta la rezolve problema natureza atu nune’e enkoraja atu reativa guarda Floresta iha rai laran hodi halo kontrolu ba ambiente. Tuir Notisia ne’ebé mak BT Sita husi Jornal Timor Post iha loron Segunda-Feira (28/10/2019) diretor Ejekutivu FONTIL Daniel Carmo Dos Santos hateten katak ohin loron mosu Isendiu iha Timor-Leste tanba Guarda Floresta la funsiona hodi halo kontrolu ba ambiente ne’ebé mak iha tanba ne’e presiza tenke ativu oinsá bele halo kontrolu nune’e ema labele sunu rai arbiru hodi estraga Ambiente nomos kria dezastre ba Timoroan sira.

Nia dehan bainhira Guarda Floresta la ativu signifika katak ambiente iha ai laran la seguru tanba laiha ema atu halo kontrolu. Ho akontesimentu Insendiu ne’ebé mosu iha Munisipiu Baucau Postu Administrativu Kelekai liu-liu iha foho Matebian Prezidente Autoridade Munisipiu Baucau Antonio Agosto Guterres Rekomenda ba komadante Polisia Eskuarda Kelekai atu realiza lalais prosesu investigasaun ida kelan ba insendiu ne’ebé akontese iha loron 22 no 23 semana kotu liuba ne’ebé rejulta uma hetan 3, inklui uma kultura sira inklui mos animal lubuk ida mak mate.

“Insendia ida ne’e nudar hahalok ema nian tanba ema sunu du’ut mak hamosu fali akontesimentu ida, ne’ebé nudar autoridade rekomenda ba komadante Polisia Eskuadra Kelekai atu buka Investigasaun, se deteta ema ruma nia tenke responsabiliza, deskonfia ona ema balun maibe seidauk loke prosesu klean,” dehan PAM Antonio Guterres.

Nia klarifika katak tuir informasaun balun ne’ebé hetan katak Ahi sunu husi area Postu Administrativu Watulari, Munisipiu Viqueque no ani lori konsege ahi han to’o iha foho Matebia hodi rejulta Uma populasaun nomos animal barak mak mate inklui mos plantasaun lubuk ida mak estragus.

Husi dezastre ne’e husi parte Autoridade Munisipiu Relata ona ba pate Dezastre Munisipiu hodi apoiu emergensia ba iha familia Vitima sira. Alende Tuir Informasaun ne’ebé BT hetan husi komadante Koorpu Bombeiros Dili, Fernado da Costa hateten katak Iha loron Domingo loron 20 fulan Outubru mais ou menus tuku 12 ho meudia akontese ahi han uma 5 iha Munisipiu Ermera Postu Administrativu Glenu ne’ebé ekipa Bombeiros husi Munisipiu Dili to’o kedas fatin refere hodi evakua vitima ba fatin seguru.

Tuir komadante Korpo Bombeiros Dili, Fernando Da Costa hatete insediu ne’ebé mak akontese iha Munisipiu Ermera, Postu Administrativu Glenu suku Orohou simu informasaun direita husi Diretor Geral Operasional, tanba iha ne’ebá insediu florestal ahi han foho, alarsta daet to’o komunidade nia uma.

“Parte ba Ermera nia situasaun ami simu informasaun direitu husi ami nia diretor geral operasional, iha ne’eba insediu florestal ne’e ahi han foho, ahi han bót iha ne’eba taka metin parte orohun nian ne’e metin, entaun manas makaas depois alarsta ahi ne’e lais ne’e maka hodi hetan nia motivasaun daet to’o komunidade nia uma’’. dehan Fernando Da Costa ba jornalista sira iha nia knaar fatin Kaikoli Dili, segunda-Feira (21/10/2019).

Nia informa katak kronolojia akontesimentu ne’e la’ós natureja maibe hahalok ema nian hodi hamosu situasaun refere. Husi problema refere Parlamentu Nasional Sujere ba Governu Tenki Halo Atendimmentu emerejnsia ba vitima insediu. Prezidente Parlamentu Nasional (PPN) Arão Noe hatete, situasaun ida ne’ebé grave teb-tebes tanba ne’e governu tenke hareee oinsá atu fó apoiu ba vitima sira.

‘’Ha’u hanoin ida ne’e grave tebe-tebes ha’u sujere ba governu, tenki halo ona politika ho seriu para nune’e oinsá atende liu-liu vitima sira ne’ebé ahi han uma udan mos besik ona,’’. dehan Prezidente Parlamentu Nasional (PPN) Arão Noe ba jornalista sira, Sexta-Feira (25/10/2019).

Nia hatutan, pior liu mak fulan Novembru to’o Dezembru udan monu rai ona, entaun sira ne’ebé ahi han sira nia uma ne’e sei la iha fatin atu bele hela. “Agora ahi han to’o 200 besik 300 anin mós sobu tan ho total relatoriu husi komisaun F nian ba vizita semana kotu ha’u haruka ba vizita Munisipiu 4 uma besik 600,” dehan prezidente.

Seidauk foti dadus husi akontesimentu iha Baukau, akontese iha Ainaru nian sira ne’e hotu dadus sedauk mai, ne’e katak situasaun grave teb-tebes ona tenki iha atendimentu emerjensia. Nia afirma, Primeiru fo apoiu emergensia ba 1ª faze nian hahan fo ba sira, maibé la’os to’o ida ne’e de’it, segundu tenki apoi ona material ba konstrusaun uma.

Se governu la iha meius para atu bele konstrui aranja kalen ho material fahe ba sira ida-idak, hodi hari sira nia uma nune’e para bele iha fatin ida no uma ida para sira bele hola mahon kuandu udan to’o. ‘’Tanba ne’e mak ha’u hanoin katak solusaun ida ne’ebé importante teb-tebes tenki buka solusaun iha kurtu prazu ba situasaun ida ne’e’’. Nia haktuir, ida ne’e situasaun ida ne’ebé grave ita bele konsidera klamidade nasional ida ita tenki iha desizaun ida para bele oinsá, liu-liu governu hanesan gestor tenki politika ida oinsá para halo atendimentu ba ida ne’e ho karakter emerjensia.

Ho problema refere sekretariu estadu Protesaun Sivil (SEPS) realiza kedas enkontru emergensia ida ho Pontu Fokal hosi munisipiu 12 no RAEOA objetivu husi enkontru refere oinsá fokal Point sira bele tau matan ba iha dezastre no insendiu sira ne’ebé akontese iha munisipiu. Tuir Sekretariu Estadu Protesaun Sivil (SEPS), Alexandrino de Araúju hatete,katak insediu ne’ebé mk mosu iha Timor laran tomak iha munisipiu kuaze 6-7 ne’ebé mak ema sunu rai konforme ema nia gostu deit.

“Enkontru ida ohin ne’e ho objetivo atu halo kordenasaun klean Liu tan para oinsá atu halo prenvensaun ba insendiu ne’ebé mak mosu iha Timor laran tomak, inklui munisipiu kuase 6-7 ne’ebé mak ema sunu Raí komforme ema nia gostou de’it”. dehan Sekretariu Estadu protesaun sivil (SEPS) Alexandrino de Araújo ba joranalista sira iha sala enkontru SEPS Kaikoli Dili, Tersa-Feira (22/10/2019).

Nia dehan tuir observasaun direita iha munisipiu sira hatudu katak ohin loron ema barak sunu rai tuir sira nia gostu no ikus mai hodi hamosu problema ba iha populasaun sira. Nia mos klarifika katak tuir Dadus provisório agora ne’e sae ba 700 vitima husi Munisipiu 6-7 mak hanesan Munisipiu Ermera, Likisa, Bobonaru, Ainaro, Aileu, Same, Baucau no Manatutu.

Iha fatin hanesan Pontu Fokal Dezastre Munisipiu Ermera (PFDE) Antonio Bero Do Rego, hatutan, prinsipiu fulan Outubru akontesimentu insediu ahi han rai iha Ermera ate agora sira hetan ona dadus ne’ebé hato’o husi suku mai hamutuk 714 familia afetadu maibe la konta iha kategoria. Nia haktuir, iha tipu de estragos ne’e mak ahi han 113 no 400 ital ne’e anin mak loke, loke mos edifisiu instituisaun governu nian hanesan eskola instituisaun religiogo hanesan kapela.

‘’Ami ajuda ona iha dia (03/10/2019) ami fo kedas apoiu emerjensia ba postu administrativu atulia jona B ne’ebé akontese boot ba insediu ne’e, Nia salenta, segundu foti fila fali apoiu simu fila fali dadus husi Postu Administrativu iha dia (14/10/2019) ba vitima sira hamutuk 149. Alende Insendiu ne’ebé akontese iha Munisipiu Baucau iha area sira mak hanesan Suku Maluru, Abu, Lelali, Baguia, Bualale no Lai-Sorulai. (BT)