DÍLI----Akontesimentu insendiu Ahi han Uma no Kintal populasaun ikus-ikus ne’e kuaze iha Timor laran tomak, tanba bailoron naruk depois udan la monu rai ho ida ne’e situsaun rai hotu-hotu maran no Ahi han Uma no estraga rikusoin populasaun sira nian.

Prezidente Parlamentu Nasional (PPN) Arão Noe hatete, situasaun ida ne’ebé grave teb-tebes tanba ne’e governu tenke haree oinsa atu fó apoiu ba vitima sira.

‘’Ha’u hanoin ida ne’e grave tebe-tebes ha’u sujere ba governu, tenki halo ona politika ho seriu para nune’e oinsa atende liu-liu vitima sira ne’ebé Ahi han Uma udan mos besik ona,’’ dehan Prezidente Parlamentu Nasional (PPN) Arão Noe ba jornalista sira, Sexta-Feira (25/10/2019).

Nia hatutan, pior liu mak fulan Novembru to’o Dezembru udan monu rai ona, entaun sira ne’ebé Ahi han sira nia Uma ne’e sei la iha fatin atu bele hela. “Agora Ahi han to’o 200 besik 300 anin mós sobu tan ho total relatoriu husi komisaun F nian ba vizita semana kotuk ha’u haruka ba vizita Munisipiu 4 uma besik 600,” dehan prezidente.

Seidauk foti dadus husi akontesimentu iha Baucau, akontese iha Ainaro nian sira ne’e hotu dadus seidauk mai, ne’e katak situasaun grave teb-tebes ona tenki iha atendimentu emerjensia. Nia afirma, Primeiru fo apoiu emergensia ba 1ª faze nian hahan fo ba sira, maibé la’os to’o ida ne’e de’it, segundu tenki apoiu ona material ba konstrusaun uma.

Se governu la iha meius para atu bele konstrui aranja kalen ho material fahe ba sira ida-idak, hodi hari sira nia uma nune’e para bele iha fatin ida no uma ida para sira bele hola mahon kuandu udan to’o. ‘’Tamba ne’e mak ha’u hanoin katak solusaun ida ne’ebé inportante teb-tebes tenki buka solusaun iha kurtu prazu ba situasaun ida ne’e’’.

Nia haktuir, ida ne’e situasaun ida ne’ebé grave ita bele konsidera klamidade nasional ida ita tenki iha desizaun ida para bele oinsa, liu-liu governu hanesan gestor tenki politika ida oinsa para halo atendimentu ba ida ne’e ho karakter emerjensia. (BT)