DÍLI----Iha Loron Tersa-Feira 23 Fulan Setembru, Instituisaun Sosiedade Sivíl ne’ebe hamutuk ho Ativista Estudante Ensinu Báziku, Ensinu Sekundária Jerál no tékniku vokasionál too Úniversidade hotu realiza eventu marsa Justisa Klimátika iha Timor-Leste.

Movimentu Marsa Justisa Klimátika ne’ebe hala’o movimentu hahú husi Palásio Governu too iha Ponte B. J Habibie Bidau Santa’ana, hodi kombate Mudansa Klimátika iha Timor-Leste. Tuir Sekretáriu Estadu Ambiente (SEA) Demétro Do Amaral De Carvalho hatete, movimentu laos deit asaun, maibe movimentu ida ne’e sei partisipa iha asaun ne’ebe fo aktivu hodi kontribui prátika no hodi redus Timor-Leste nia emisaun.

“Luta ida ne’e no movimentu ida ne’e iha asaun ida espera movimentu ida ne’e sei partisipa iha asaun ne’ebe fo aktivu tebes, hodi kontribui prátika diak sira, konsentra ita nia ambiente prátika diak hodi redus ita nia emisaun sira,” dehan Sekretáriu Estadu Ambiente (SEA) Demétro Do Amaral De Carvalho, nia Diskursu iha Ponte B. J Habibie Bidau Santa’ana, Tersa-Feira (24/09).

Nia hatutan iha tinan 2006 Timor-Leste ratifika ona alterasaun klimatika no iha tinan 2007 Timor-Leste hahú implementa. “Timor-Leste ratifika konvensaun alterasaun klimátika hahu iha tinan 2006 no ita ratifika prokolu kiotu iha tinan 2007 ita hahu implementa obrigasaun konvesaun sira ne’e hahu iha tinan 2007 tesik mai,”

Govenante ne’e informa iha tinan 2011 Timor-Leste produs dokumentu ida ne’ebe sai matadalan ba politika alterasaun klimátika iha Timor-Leste mak dokumentu ida planu adaptasaun nasionál ba alterasaun klimátika ninian no dokumentu mapa. Nia dehan iha dokumentu Mapa deskrevé prioridade ne’ebe ita hahú implementa no hahú kedas iha inisiu, no ninia implementa programa Mapa, too ohin loron Govenu Timor-Leste partsitipa iha konferénsia Japarte iha Nasoens Unidas nian, ita mobiliza ona rekursu internasionál sira.

Tamba ne’e la’os ita mak halo Gás Estufa no kauza problema Globa Golpe iha mundu, ita sai vítima ba prosesu, tanba ne’e ita hakarak atu partisipa iha konvensaun sira ne’e hodi kapitaliza oportunidade ba dezenvolvimentu iha Timor-Leste. SEA dehan Timor-Leste simu apoiu iha área oi-oin, liu Miliaun $100, iha Pipline Miliaun $64 hanesan Díli Ainaro Corridor manatutu natarbora corridor osan sira ne’e ho iha relasaun ne’e ho implementasaun planu nasional adaptasaun nian.

Iha fatin hanesan Ativista Juvinal Dias esplika parte ida husi Movimentu luta Global Justisa Klimátika ne’ebe halibur ema hamutuk Miliaun ba Miliaun iha mundu tomák, mundu agora hasoru krize klimátika númeru frekuénsia husi klimátika ne’ebe manás iha mundu tomák. Ativista hatutan Timor-Leste iha lista da hituk husi lista nasaun ne’ebe inklinadu, atu hetan dezestra naturais, mudansa klimátiku mak Timor-Leste infrenta ho kondisaun klimátika ne’ebe la predizivel inklui bailoron ne’ebe naruk inundasaun no ria monu.

Tanba ne’e Problema krize klimátika halo área agrikultura no uma kain sira ne’ebe mak moris iha kondisaun ho ki’ak ne’ebe estremu tebes. Ativista Juvinal esplkia luta hasoru mudansa klimátika no luta hasoru pobreza ne’ebe presiza la’o hamutuk, tanba ema ki’ak sira iha nasaun sira ne’ebe vulneravél mak selu kustu ne’ebe todan tebes, governu iha mundu tomak tenki investe ho solusaun klimátika ho matenek atu nune’e bele ajuda halo komunidade sira.

Iha tinan 2015 Timor-Leste sai hanesan parte husi nasaun da uluk, balun ne’ebe aprova ajenda tinan 2030 ONU nian ba Objetivu Dezenvolvimentu Sustentavel (ODS) númeru 13 mak atu foti asaun urjenti atu kombate mudansa klimátika ho nia impaktu sira. Alende ne’e mos Ministra Edukasaun Joventude no Desportu (MEJD) Dulçe de Jesus Soares hateten, MEJD servisu hamutuk ho Eskola Ensinu Báziku rua ho tolu hanesan ne’e, ne’ebe mak mai akompaña eventu ida ne’e, atu nune’e estudante sira nia hanoin kona-ba oinsá mak atu protese ambiente iha Timor-Leste.

Governante hatutan prezensa ohin ne’e atu asiste no hakarak rona estudante sira nia liafuan kona-ba ambiente nian, hanesan maneira ida atu estudante sira bele kompriende liutan kona-ba importánsia husi oinsa kuidadu ambiente nian. Ministra mos dehan materia kona-ba ambiente iha ona kuríkulu no báziku sei haré tan iha Kuríkulu Ensinu Sekundáriu Jerál Tékniku Vokasionál atu halo revizaun, inklui mos materia sira ne’ebe mak importante tebes kona-ba ambiente nian. MEJD materia konklui ona iha kuríkulu, iha mos materia loke espesial ida kona-ba jardin eskola parte ida, oinsá atu porteze ambiente, kuríkulu ne’ebe mak halo ona primeiru no segundu siklu, iha ona materia kona-ba ambiente nian. (BT)