DÍLI----Konstrusaun Edifisiu Fakuldade Enjenária Siensia no Teknolójia (FEST) Úniversidade Nasionál Timor Lorosa’e (UNTL) iha Hera ne’ebé finansia hosi Governu Japaun dadauk ne’e atinji ona 90%, tanba ne’e iha tempu badak sei entrega ba Governu Timor-Leste hodi inaugura atu nune’e estudante bele utiliza hodi hala’o prosesu aprendisazen.

Tuir Xefí Reprezentante Japaun International Cooperation Agenjia (JICA), Nagaishi Masafumi hatete, objetivu vizita edifisiu ne’e atu hare projetu konstrusaun ida ne’e ninia prosesu ne’e la’o oinsa no konstrusaun ne’e agora dadauk atinji ona 90%.

“Objetivu ohin hamutuk ho funsionariu JICA nian ne’ebe mak mai vizita ne’e atu haree konstrusaun edifisiu ninia progresu ne’ebe mak dadauk ne’e atinji ona 90%, ne’ebe mak iha tempu badak sei entrega ba Governu Timor-Leste hodi halo inaugura,” dehan Nagaishi Masafumi hafoin remata vizita Edfisiu Konstrusaun UNTL ne’e ba Jornalista sira iha Edifisiu Fakuldade Enjenária Siensia no Teknolójia Hera, Tersa-Feira (03/09).

Nia hatutan Orsamentu finansia husi JICA ba projetu ida ne’e kuaze $20 Miloens hanesan ne’e, no projetu ida ne’e sei finaliza iha Fulan Outubru tinan 2019. Kona-ba transporte ne’ebe mak atu fasilita ba estudante sira husi Kapital Dili mai eskola iha Hera ne’e, laiha planu ba programa ida ne’e, maibe programa ida ne’e ba parte Governu Timor-Leste nian mak bele tau matan ba programa ida ne’e.

Reprezentante JICA esplika Projetu ida ne’e konsulta no kontraktor ne’e mai husi Governu Japaun hotu, konsulta naran IAMA SITA SIKEI no Kontraktor naran RINKAI ISA. Alende ne’e Project Management Isogai Hiroyuki hatutan iha edifisiu refere iha sala aula hamutuk 90 inklui mos aula ba Dosenti sira, Laboratóriu no Auditóriu. Nia esplika sala Aula sira ne’e ho medida boot no ki’ik, medida boot mak bele akumula estudante 15, nune’e mos aula ba Dosenti sira hamutuk 25, dadauk ne’e progresu atinji ona 90% husi aula hotu.

Isogai hatutan husi sala hamutuk 90 ne’e sala lima mak sei uza ba prátika nian, no laboratóriu, ba departamentu Informasaun Teknolójia (IT) rua, ba jeolgia no rua seluk ba jerál nian. Nia haforsa tan iha Biblioteka ho medida ne’ebe mak bele akumula estudante hamutuk 400, maibe sala auditóriu seidauk remata no atinji ona 90%.

Tanba ne’e konstrusaun harí atu tau importánsia ba estudante sira ne’ebe mak ho kondisaun ne’ebe mak defisiente, ne’e mos iha, sira bele halo eskada no rampa, atu nune’e estudante sira ne’ebe mak iha defisiente bele uza kadera roda atu bele asesu ba sala ne’ebe mak iha leten. Nia klarifika Prosesu ne’ebe mak atu instalasaun material ba edifisiu ida ne’e, sei hala’o bainhira servisu ne’ebe mak todan remata. (BT)