DÍLI----Ministériu Edukasaun Juventude e Desportu fó knaar importante ida ba Gráfika Nasional atu produz ka imprime materia ezame Nasionál no garantia sei termina tuir tempu. Diretór Gráfika Imprensa Nasionál Timor-Leste (INTL) Jaime F. M. C. Correia agradese ba Ministériu Edukasaun Juventude e Desportu ne’ebé mak fó ona konfiansa ba Gráfika Nasionál atu hala’o produsaun ba material ezame nasionál ba estudante finalista sira.

“Gráfika Nasionál simu responsabilidade boot atu bele asegura konfidensialidade ba produsaun Material ezame nasionál ne’e, Maneira atu garantia materia ezame iha prosesu produsaun mak sei asegura makas ba sistema seguransa hodi kontrolu ba funsionáriu no ema hotu-hotu no sei halo pasa revista ba funsionáriu sira iha tempu tama servisu no sai servisu atu asegura sei la lori sai matéria ezame balun ba liur,” hatete diretór Jaime F. M. C. Correia.

Nia dehan oras ne’e husi parte Gráfika Nasionál mós disponivel ona membru seguransa sivil husi feto no mane atu bele halo kontrolu ho efetivu ba funsionáriu no vizitante sira, tanba seguransa sivil sei mós asegura kontrolu ba funsionáriu sira. Gráfika Nasionál sei hala’o servisu durante oras 12 hahú husi tuku 8:00 dadeer to’o tuku 8:00 kalan. Sei servisu makas atu bele finaliza duni prosesu produsaun imprime ba material ezame tuir loron ne’ebé mak determina ona.

Ministra Edukasaun Dulce de Jesus Soares hateten parte Ministériu Edukasaun fó fiar ba gráfika Nasionál tanba hare Gráfika Nasionál iha dezempeñu di’ak no mós iha ona esperiénsia barak hodi kaer ho Gabinete Presidente Da Repúblika no Konsellu De Ministru, hetan mós fiar husi governu hodi halo produsaun urna ba eleisaun antisipada no kualidade di’ak.

“Oras nee tama iha faze servisu makas husi parte Ministériu Edukasaun Desportu no Juventude presiza atu produs material ezame nasionál ba estudante husi eskola Ensinu Báziku 30.121, Sekundária Jerál 17.7953 no Tékniku Vokasionál 5.227 no total finalista 53.101 iha territóriu Timor Laran, ho númeru ida ne’ebé boot tebes mak tenke asegura kualidade no prosesu hotu tenke finaliza tuir data kontratu, tan nee tenke fó fiar ba Gráfika Nasionál nu’udar mós instituisaun governu nian,” Dehan Ministra Edukasaun Dulce de Jesus ba Jornalista sira iha Edifísiu Gráfika Nasionál bainhira ba halo inspesaun ba mákina produsaun iha Kolmera.

Ministra Dulce mós hateten katak halo ona koordenasaun ho Ministériu Prezidénsia do Konsellu de PrimeiruMinistériu hodi deside tuir estudu viabilidade ida katak sei gastu osan menus kompara ho fó ba kompañia privadu ho razaun seluk mak tanba instituisaun Imprensa Nasionál ne’e mós iha Konsellu Ministru nia okos.

“Hare mós katak ida ne’e sai nu’udar faze investimentu no esplorasaun liu husi instituisaun governu nian no bele hetan presu ida ne’ebé mak efetivu tebes no mós fatin ida ne’e sai hanesan fatin ida ne’ebé mak importante tebes atu governu presiza atu tau importánsia tanba sei fó benefísiu boot tebes ba nasaun Timor-Leste,” Dehan Nia. Ministra Edukasaun Dulce De Jesus husu ba gráfika Nasionál atu bele servisu ho responsabilidade atu bele mós garantia ba konfidensialidade atu bele nafatin manan konfiansa husi parte instituisaun tomak governu nian. (BT)