DÍLI----Sekretáriu Estadu Juventude no Desportu (SEJD) Nélio Issac Sarmentu ne’ebe hamutuk ho Ministru Defesa no Seguransa Filomeno Paixão de Jesus enkontru ho Primeíru Ministru iha Palásio Governu, hodi ko’alia kona-ba planu tinan oin oinsá komprimísiu foun hodi fó apoiu orsamentu ba atividade Konsellu Polísia Komunitária (KPK) iha kada Suku iha Timor-Leste.

“Tinan oin Governu iha komprimísiu foun ida, ne’ebe mak iha atividade foun ida relasiona oinsá mak fó atensaun ba Konsellu Polísia Komunitáriu (KPK) ba kada suku iha Timor laran tomák,” informa Sekretáriu Estadu Juventude no Desportu (SEJD) Nélio Issac Sarmentu hafoin enkontru ho Primeiru Ministru iha Palásiu Governu, Segunda-Feira (02/09).

Nia hatutan oinsá mak atu organiza optimal liutan, serivu KPK nian atu bele fó asisténsia ne’ebe mak diak liu, ba ita nia kada Suku iha Timor laran tomák, KPK ne’e maioria involve hosi joven sira. Governante ne’e informa hakarak iha tinan oin husi Orsamentu Jerál Estadu husi Governu nian, atu apoiu grupu KPK nian, la’ós ba asuntu seguransa iha kada Bairro Suku sira nian, maibe oinsá mak atu optimiza ba sira nia servisu, hodi organiza aan atu partisipa mos iha eventu no organiza mos atividade sira seluk ne’ebe mak iha kada Suku laran.

“KPK durante ne’e organiza husi Ministériu Interiór, agora Governu atu fo apoiu ba husi orsamentu ba servisu KPK, mak Xefí Governu orienta Ministru Interiór ho Sekretáriu Estadu Juventude no Desportu, atu hare oinsá apoiu kanaliza husi SEJD,” dehan Nelio. Nélio esplika KPK seidauk harí iha Suku hot-hotu, signifika sei iha tan Suku balun ne’ebe mak atu harí, ne’ebe kabe ba SEJD atu haree organiza KPK iha kada Suku hodi koordena ho komandante Polísia, no atu organiza hodi bele hetan oportunidade no subsidiu ne’ebe mak Governu prepara ba tinan oin.

Governante ne’e realsa tan subsidiu prepara ba tinan oin ne’e subsidiu dala ida deit, siknifika sira tenki organiza halo didiak hodi uza oportunidade ne’ebe mak Estadu fó, atu nune’e bele organiza diak ba kada Suku iha Timor laran tomak. Nia haforsa Xefí Governu Taur Matan Ruak mos konkorda ona ne’ebe orsamentu ba KPK nian iha SEJD, no posibilidade tan ba grupu KPK iha Suku ne’ebe mak oras ne’e seidauk harí.

KPK durante ne’e ajuda PNTL, atu tau matan ba situasaun seguransa nian, iha bairro no kada Suku sira, nune’e mos bele ajuda PNTL hodi halo kontrolu, maibe inflismente suku hot-hotu seidauk iha, balun organiza diak no balun organiza ladiak. Tanba ne’e mak programa foun ida ne’e ho involvimentu SEJD iha planu atu organiza diak liu tan ba KPK sira, la’ós deit hanoin kona-ba seguransa, maibe sira mos involve iha atividade sira seluk iha Suku no bairro laran.

“Ita tau orsamentu iha KPK, atu nune’e sira bele iha orsamentu ne’ebe hodi sustenta moris no atu oganiza aan iha Suku no Bairro laran,”dehan nia. Nia haforsa tan importante liu mak suku tenki hakmatek, Suku tenki mos husi lixu no suku tenki diverta ajuda inan aman sira ho atividade ne’ebe mak iha Suku no Bairro laran, bianhira Governu fo apoiu, maibe la organiza halo didiak ne’e Governu la apoiu ona, maibe mos sira tenki responsabilidade. (BT)