DÍLI----Sentimentu ksolok metin iha fuan maibé iha mos trauma husi ameasa, torturasaun no oho iha momentu prosesu ba povu atu deside rasik ukun aan.

Diretora TimorPost Santina da Costa Araújo hatete loron 30 de Agostu 1999 sai hanesan loron ikus ba Timoroan sira hodi deside katak Timor-Leste nudár nasaun ida.

“Prinsípiu ukun rasik aan metin ona iha isin no klamar maski terus, susar no mate maibé prinsípiu ida ne’e labele troka ho saida de’it. Mate ka Moris no prinsípiu fundamental ne’ebé mosu rasik husi fuan no sei la husik to’o realiza duni prosesu ida to’o rohan, ”dehan Diretora TimorPost Santina da Costa Araújo ba Jornalista Business Timor iha knaar fatin Bebora, Tersa-Feira (06/08).

Iha altura povu hotu hahú moris iha situasaun ameasa hanesan Jornalista feto ida ho aten brani hala’o knaar hodi halo kobertura no buka maneira oinsá atu bele kontribui nafatin ba prosesu Libertasaun de Pátria iha fulan Agostu 1999. Diretora ne’e haktuir tan katak bainhira vota iha dia 30 de Agostu 1999 remata sentimentu ne’ebé mak mosu katak Timor-Leste merese atu hetan ukun rasik aan, tanba povu barak mak mate no sofre ba rai doben ne’e.

Maski iha situasaun difisil no ameasa boot ba vida iha mós presaun laran maibé la iha hakarak seluk, hakarak ida loloos mak tenke liberta duni aan husi votu ida ne’ebé mak oferese ba ukun rasik aan liu husi votasaun. “Nu’udar umanu sempre iha sentimentu ta’uk maibé hanesan jornalista ida prontu hasoru difikuldade hodi hala’o knaar iha momentu ida ameasa boot ba vida, iha isin sinte ta’uk maibé ho domin iha fuan la ta’uk hasoru mate bainhira Timor-Leste la ukun rasik aan, ”haktuir Jornalista senior ne’e.

Urna ida ne’ebé mak simu iha 30 de Agostu 1999 kaer iha liman hodi vota ba ukun rasik aan. Depois de vota ho esperansa boot hakarak lalais atu hatene rezultadu ho esperansa katak Timor-Leste tenke ukun rasik aan duni. Prosesu hotu la fasil maibé ho domin boot ba rai doben ikus mai mosu duni esperansa ida ne’ebé mak durante ne’e tau hela iha fuan.

Depois de Timor-Leste hetan rezultadu iha dia 04 fulan Setembru hamosu sentimentu ksolok no trauma tanba situasaun ne’ebé mak la amizade no fó ameasa tebes ba vida. Alende hala’o knaar nu’udar jornalista ne’ebé mak sempre hasoru malu ho ema barak sai ameasa boot ba vida maibé sempre hafalun ta’uk no aten brani hodi prontu atu dedika aan ba vida Jornalista.

‘’Depois hetan independénsia buat barak mak hetan estragus no tenke hahú husi zero tuir loloos ha’u lakohi ona atu sai jornalista hodi ba buka fali serbisu iha fatin seluk maibé tanba sente katak vida jornalizmu ne’e metin ona iha ha’u nia isin no ran tan ne’e mak sei nafatin hakarak kontribui ba nasaun doben Timor-Leste liu husi vida jornalista nian,’’ dehan Jornalista feto timoroan ne’e.

Tuir nia observasaun katak oras ne’e dezenvolvimentu iha area jornalista nian makas tebes-tebes no iha mudansa barak tebes tanba oras ne’e iha media barak tebes no ida ne’e sai kompetisaun boot tebes ba setór negósiu nian, tanba alende media sai pillar prinsipál ba papél jornalizmu maibé mós bele sai investimentu di’ak ida hodi kontribui mós ba dezenvolvimentu ekonomia iha rai laran.

Mensajen espesiál husi Diretora Diáriu TimorPost Santina ba Joven sira ne’ebé mak sinte jornalista sai nu’udar vokasaun ida mak tenke tuir formasaun hodi prepara aan didi’ak atu bele kualifikadu hodi hakerek notísia hodi oferes ba leitór sira. Oras ne’e iha kompetisaun boot tebes ba jornalista sira hotu liu husi media sosiál tan ne’e tenke preparadu di’ak. Hakarak husu ba lideransa sira tomak atu bele fó liman ba malu hodi lori povu ba moris di’ak. (BT)