DÍLI----Atividade Sertame ba estudante sira nudar mós programa edukativu nian ne’ebé tama iha programa komemorsaun tinan 20 konsulta popular tanba ne’e Ministeriu Edukasaun Juventude no Desportu ho Centru Nasionál Chega (CNC) realiza mós kompetisaun Sertame ba estudante sira.

Iha sertame ida ne’e manán na’in ba primeiru lugar husi Munisípiu Ainaro II lugar husi Munisipiu Baucau III lugar husi Munisípiu Lautém no IV lugar husi Munisípiu Manufahi. Programa sertame final ne’erasik hala’o hala’o iha Centru Konvensaun Díli (CCD) ne’ebé partisiopa hosi estudante sira hosi Munisipiu hotu inklui Rejiaun Admistrativa Espesial Oe-Cusse Ambeno.

Ministra Edukasaun Juventude no Desportu (MEJD) Dulce de Jesus hatete atividade ne’e importante tebes no atividade ne’e mós sei kontinua hanesan programa importante ne’ebé iha Ministeriu Edukasaun juventude no Desportu (MEJD) nian. “Tinan-tinan kontinua hala’o atividade sertame no iha disiplina sira seluk, maibe importante mós atu iha sertame espesifiku hanesan ba asuntu ida ba istoria Timor-Leste nian,”dehan Ministra ne’e ba Jornalsita sira.

Nia dehan eventu ida ne’e la’os deit atu buka manan nain, maibe hanorin mós buat barak ba estudante sira konaba luta rezistensia to’o hetan ukun rasik-aan. Dulce informa vensedór ba sertame ida ne’e sira mai hetan kustu ba sira nia estadia iha Kapital Díli, no sira manan sira sei hetan mos premiu, MEDJ mos hanoin sira ne’ebé mak manan iha futuru sei haruka sira tuir estudu komparativu iha fatin ruma, atu nune’e sira bele motivadu liu ba sira nia estudu ba futuru nian.

Estudante Ensino Sekundáriu Gerál Katóliku São Françisco Asis Fatuberliu, Munisípiu Manufahi Cela Sarmentu Alves senti kontenti tanba bele partisipa eventu boot ida ne’e. “Durante sermate ba loron ohin nian senti haksolok tebes tanba bele partisipa iha eventu ida ne’e, tanba eventu ida ne’e hanesan eventu ne’ebé mak boot tebes ne’ebé mak ami bele partisipa husi munisipiu ne’ebé mak bele tama sertame tinan ida ne’e no ami senti kontente,” dehan Estudante Esnsino Sekundáriu Gerál Katóliku São Françisco Asis Fatuberliu ba Jornalsita Business Timor (BT) hafoin remata sertame final, Kinta-Feira (28/08).

Estudante ne’e husu ba nia maluk Estudante no Juventude sira atu tane ass istória Timor-Leste nian. “Ita mak fini foun ba nasaun ida ne’e nian, hakbesik-aa mai ona ita hotu tene aas ba ita nia istória nasaun ida ne’e nian, tanba dadauk ne’e tuir ita nia observasaun maiória joven barak mak ladun rekoñese no koñese ba ita nia istória timor nian,”dehan nia. Ekipa hamutuk 13 ne’ebé mai partisipa iha kompetisaun final ne’e nudár vensedor husi Munisipiu 12 inklui RAEOA mak hala’o iha dezenpeñu ne’ebé mak diak. (BT)