DÍLI----Restorante UMA-NAE no Darda GM husi Munisipiu Vikeke sai vensedór primeiru lugár ba iha kompetisaun te’in hahán lokal iha feira Gastronómia ne’ebé organiza hosi Ministériu Turismu Komérsiu no Indústria (MTKI) hodi komemora tinan 20 Konsulta Popular no Misaun INTERFET iha Timor-Leste.

Feira Gastronómia ne’ebé realiza iha Centro Covencões Dili ne’e, hodi halo kompetisaun te’in hahán lokál hosi otél no restorante sira iha nasionál no husi Munisipiu ne’e hodi hatudu hahán ne’ebé mak kada Munisipiu iha ho nune’e restorante Uma-Nae sai primeiru lugar, Restorante Darda GM sai Segundu Lugar no Restorante Angel husi Munisipiu Lautém Treseiru Lugar ba eventu ida ne’e. Na’in ba Restorante UMA-NAE Munisipiu Vikeke Helena Henrique Xavier Gomes sente kontente no husu obrigadu ba suporta hotu ne’eb’e iha.

“Sente kontente, prvilejiu ida ne’e ba ha’u sente kontente, maibe tanba ha’u nia rain, ha’u nia maluk husi Munisipiu Vikeke ne’ebé mak hodi suporta no Orasaun mai ha’u, liu-liu ba hau nia matebian sira no ema hotu nia suporta ne’ebé mak husi Ministeriu Turismu nian, ”dehan Helena Henrique Xavier Gomes.

“Ami nia konbinasaun hahán lokal ne’ebé mak diak, no ami esforsu an atu kompete liu tan iha Merkadu Internasional no liu-liu atu serve ba bainaka sira ne’ebé mak sei partisipa ita nia loron boot ida ne’e, ha’u prontu no ha’u nia restorante ne’e ema hotu hatene katak, ha’u sei produs produtu lokal iha ha’u nia Munisipiu Vikeke,” hatete nia Nia dehan hahán produtu lokal lahamutuk ho produtu husi estranjeiru nian, komesa husi hahán no hemu ne’e husi produtu timor nian no husi munisipiu vikeke nian rasik, no sei prontu hala’o ba aktividade ida ne’e no prontu atu kompete internasionál.

Nia haforsa tan kontenti tanba Selebrasaun Tinan 20 Loron Konsulta Popular, ne’ebé mak ita hanoin fila-fali ba kotuk senti triste tanis no halerik, tanba ita nia maluk barak mak dedika an tomak ba rai ida ne’e to’o ikus ita ukun rasik an, maibe ida ne’e ba oin senti kontenti tanba Timor-Leste mos bele ukun an mesak iha mundu.

Entretantu Prezidenti Juri Luis Simões hatete ohin sira nia parezentasaun hatis tais ne’ebé mak husi Munisipiu ida-idak nian, tanba restorante barak mai halibur ho hatudu sira nia produtu lokal, maibe Primeiru lugar no Segundu lugar husi Munisipiu Vikeke nian no terseiru lugar mak husi Munisipiu Lautém.

“Ohin ita utiliza avalia sira uza sasan ijene seguransa no alimentar, no avalia sira nia aprezentasaun konaba hahán, no sira nia aprezentasaun hatais ne’ebé mak hotu husi lipeza ne’ebé mak diak, no iha hotu organizadu sira rasik mak tein hodi mai aprezenta,” dehan Prezidenti Juri Luis Simões hafoin feria ba komemora tinan 20 Loron Konsulta Popular no Misaun INTERFET ba Jornalista sira iha CCD, Tersa-Feira. (27/08).

Nia hatutan maibe konkursu no kompetisisaun ida ne’e ita husu sira atu nune’e bele hasa’e kreatividade, tanba ema halo buat ruma tenke kriativu atu nune’e ita senti kontenti ne’ebé mak sira utiliza produtu lokál Timor nian, atu valoriza kresimentu ekonómia nian iha Timor-Leste.

Tanba dalaruma restorante na’in mak mai, maibe ita mos hakarak fo valor atu nune’e sira rasik mak te’in, tanba sira mak iha esperensia ne’ebé mak boot. Prezidenti Juri ne’e informa hakarak promove no hatudu ba oin atu nune’e sira iha kapasidade kreatividade no koñesimentu konaba hahán nian, atu bele ema hotu hatene. Nia esplika konaba hahán la pressiza teknolójia ne’ebé mak diak, importante mak iha ingradeta ne’ebé mak kualidade, timor-leste iha ingradeta barak no iha kualidade ne’ebé mak iha.

Luis hstutan dalaruma ema la fo valor ba produtu timor nian, maibe fo valor ba produtu ne’ebé mak mai husi rai liur, haluhan tia Timor-Leste nia produtu, tanba uza produtu ne’ebé mak husi Timor-Leste la presiza atu utiliza teknolojia atu halo hahán ne’ebé mak diak. Tanba ne’e espesifiku ne’ebé mak fo valor husi Priemeiru lugar Segundu lugar no Treseiru lugar sira aprezenta konbinasaun ne’ebé mak diak ne’ebé mak relasiona ho kreatividade no sira nia tradisaun husi Munisipiu Vikeke no Lautém.

Ita fo oportunidade atu nune’e sira uza hahán nafatin husi Vikeke no Lautém ne’ebé mak lori husi hahán lokal rasik, no sira mak manan ba Primeiru lugar, tanba konjugasaun ne’ebé mak diak, liu husi hahán tradisional kreatividade ijieni no aprezentasaun ne’ebé mak diak. (BT)