DÍLI----Kompañia Telekomunikasaun Ceslink ne’ebé iha fulan hirak liubá governu aprova ninia proposta hodi investe iha Timor-Leste sente sai vítima ba publikasaun informasaun falsu iha media sosiál ne’ebé ho naran Ceslink Timor-Leste.

Iha semana kotuk iha media sosiál liu-liu facebook ema barak kuaze fahe tutan (share) no halo komentáriu ba informasaun falsu ne’ebé lansa hosi fung page facebook ho naran Ceslink Timor-Leste ne’ebé promete atu fahe prémiu ba sira ne’ebé share informasaun ne’e barak liu no halo komentáriu númeru telemovel iha koluna komentáriu nian.

Maske nune’e Head of Marketing Monis Maia hatete, sira lamenta ho ema balun ne’ebé mak kria pájina falsu hodi fahe informasaun bosok uza Ceslink nia naran, tanba pájina kompañia Ceslink nia loloos mak Ceslink de’it la’ós Ceslink Timor-Leste. Hare ba asaun ida ne’e fó implikasaun negativu tebes ba Ceslink tan ne’e mak husi parte buka tuir hela autór ne’ebé mak kria pájina falsu ne’e no kria iha ne’ebé no sei hato’o keixa ba parte kompetente hanesan Polísia Nasionál Timor-Leste (PNTL).

“Ida ne’e asaun ida ne’ebé mak hakarak atu hamonu kompañia Ceslink nia integridade ka hafo’er naran husi kompañia Ceslink nian, Tanba sai ona vítima ba asaun hanesan ne’e mak oras ne’e parte Ceslink sei koopera no Polisia Nasionál Timor-Leste sei buka tuir autór no bainhira identifika mak sei prosesu tuir lei ne’ebé iha,” Dehan Jerente Marketing Ceslink, Monis Maia ba Jornalista Business Timor iha Edifísiu Ceslink Bidau Lesidere, Kuarta (31/07) hafoin konfirma asuntu ne’e.

Nia informa tan katak atualmente kompañia Ceslink seidauk publika informasaun ruma kona-ba programa bonus ou hetan sorte. “Seidauk to’o tempu atu Ceslink fó sai informasaun hirak hanesan ne’e tanba ida ne’e sai mós programa husi Ceslink maibé seidauk to’o tempu atu realiza,” esplika nia.

Tanba investimentu ida boot hanesan kompañia Ceslink hala’o iha setór Telekomunikasaun nian presiza duni programa ba dada sorte maibé tempu seidauk to’o. Ceslink nu’udar operadór nasionál tan ne’e la fasil atu kompete ho operadór Internasionál tolu ne’ebé mak eziste ona iha Nasaun Timor-Leste. Tan ne’e mak Ceslink sente katak ho asaun ida hanesan ne’e sai fatór negativu boot ida tanba ne’ebé halakon konfiansa husi komunidade.

ezisténsia Ceslink nian hodi investe iha indústria telekomunikasaun ne’e hetan ona a favór husi parte governu no komunidade hotu tanba ne’e primeira vez timoroan rasik iha vontade no aten barani atu investe iha setór telekomunikasaun nian. “Ita hotu hatene katak oras ne’e ita ukun-an durante tinan 20 ona maibé seidauk iha timoroan ida mak barani atu investe iha setór telekomunikasaun hodi kompete no ema estranjeiru sira,” nia argumenta.

Jerente Marketing ne’e ha kle’an liu tan katak oras ne’e Ceslink solidu ona ho parte kompetente sira hanesan, autoridade lokál, parte seguransa no parte governu nian, hodi hetan apoiu másimu ba investimentu ida ne’e tanba haree katak bele fó benefísiu di’ak ba povu Timor-Leste rasik.

Ceslink sente sai duni vítima mak hanesan, hamonu ona integridade kompañia Ceslink nian, no públiku sei bele julga Ceslink bainhira tuir informasaun falsu katak iha dia 4 Setembru sei fó prémiu ba komunidade sira ne’ebé mak apoiu ba ezisténsia Ceslink nian mak, sei implika ba realidade kompañia nian tanba komunidade sei dehan Ceslink bosok ten. No implikasaun seluk mak sei hatudu ba kompañia tolu seluk katak Ceslink la iha seriedade ba investimentu.

Jerente Marketing ne’e husu ba komunidade sira atu labele fiar ba informasaun falsu ne’ebé mak fó sai husi ID falsu iha pájina Facebook. Programa prepara sorteu hanesan ne’e kompañia Ceslink bele halo maibé seidauk to’o tempu no bainhira realiza ona lansamentu mak sei realiza buat hotu.

Entretantu iha semana kotuk mosu pagina facebook ida ne’ebé ho naran Ceslink Timor-Leste ne’ebé publika informasaun katak Ceslink sei fahe premeiu ba manán nain liu hosi hakerek númeru telekomovel iha koluna komentáriu no fahe tutan (share) informasaun ne’e ba públiku sei hetan prémiu sira hanesan motorizada, telemovel no sasán eletróniku seluk. Bainhira BT konfirma informasaun ba promosaun ne’e kompañia Ceslink deklara katak ne’e informasaun falsu. (BT)