SUAI----Komunidade Aldeia rua hanesan Fatuloro no Makous Suku Taroman Postu Administrativu Fatululik Munisipiu Covalima ejize ba governu atu hadi’a estrada no mós dada enerjia eletrisidade ba sira tanba durante ne’e komunidade seidauk sente estrada ne’ebé di’ak no naraoman eletrisidade nian.

Reprezentante komunidade Aldeia Fatuloro Armando Pereira esklarese probelma boot liu ne’ebe komunidade iha baze hasoru mak problema estrada tanba kondisaun estrada ne’ebé at no e obrigadu mós komunidade sira mak halo ho liman.

“Problema boot liu ba ha’u mak estrada, estrada husi postu Fatululik liga ba Postu Suai ate agora seidauk hadi’a, estrada iha area Maucatar nian, mai area Postu Fatululik nian mós at hotu, no uluk husi parte balun halo ona ponte ki’ik ida iha area Tafara nian partensia ba Postu Tilomar maibé to’o ohin loron husik hela de’it, ne’ebé hanesan ami husi Aldeia Fatuloro no Aldeia Makous sente hanesan sai fali izoladu iha ukun rasik-an ida ne’e,” komunidade ne’e preokupa.

Armando hateten ho estrada ne’ebé at no la ihatan eletrisidade komunidade sira sente sira nia Aldeia izoladu tebes iha tempo ukun rasik-an ida ne’e. “Ami husi Aldeia rua ne’e sente hanesan sei izoladu hela, tanba sa eletrisidade mos la tama, mai iha Aldeia rua ne’e,” dehan nia. 

Populasaun ka komunidade iha Aldeia Fatuloro ho total xefe familia 400 resin no Aldeia Makous iha Xefe familia 200 resin. Liga ba problema estrada komunidade husu ba ministeiru relevante atu oinsa bele tau matan ba estrada liga Postu Maucatar ba Postu Fatululik.

Entertantu hatan ba preokupasaun komunidade nian ne’e diretor Obras Publiku Munisipiu Covalima, Alberto Cardoso informa munisipiu Covalima laiha kapital dezenvolvimentu tanba ne’e difisil atu rezolve lalais problema hirak ne’e maibe problema sira ne’e informa ona ba diresaun nasional no hein de’it.

“Informasaun ida ne’e mós ha’u pasa ona ba iha diretor nasional no diretor nasional resposta dehan katak, uluk falow up ne’e iha ekipa tekniku ida mak mai ona atu halo identifikasaun ba buat sira ne’e hotu, nebe’e ita hein to’ok hodi hare,” hatete diretór ne’e. (BT)