DÍLI----Organization Internasional Labour (ILO) hasoru malu ho Camâra Comercio Industria de Timor-Leste (CCI-TL), hodi diskute konaba programa dezenvolvimentu estrada rural ba faze daruak iha 12 munisipiu.

Consultor ILO Nivio Mangalaes hatete, vizita ne’e ho objetivu atu halo diskusaun ho CCI-TL, kona-ba planu hosi programa estrada rural ba dezenvolvimentu. ne’ebé tempu badak sei hala’o assinatura ba extensaun faze daruak (2) hosi akordu entre governu Australia no Timor-Leste.

“Objetivu hosi vizita ida ne’e atu halo diskusaun ho CCI-TL, konaba planu hosi programa estrada rural ba dezenvolvimentu. Tanba iha tempu badak sei halo assinatura ba extensaun faze daruak, hosi akordu governu Australia no Timor-Leste”dehan Nivio ba Jornalista BT wainhira remata inkontru iha edifisiu CCI-TL,kinta-feira 14/03).

Nivio hatuan, iha oportunidade ne’e ILO mos sei organiza, hodi nune’e emprezariu sira ne’ebé durante implementa programa ba projetu estrada rural dezenvolvimentu bele hola parte, tanba iha tempu besik Ministro Obras Públiku no Embaxiador Australia sei estabelese MoU, hodi ministro bele hato’o governu nia komprimisiu ba iha programa estrada rural dezenvolvimentu.

Nivio esplika katak, projetu refere sei implmenta iha 12 munisipiu, tanba ne’e iha tempu badak Ministériu Das Obras Publik sei anunsiu prosesu tenderizasaun ba públiku. Nain ba projetu refere maka Governu Timor-Leste liu hosi Ministériu Obras Públiku, governu Australia so fó apoiu ba asistensia tekniku, ne’ebé jere hosi organizsaun internasional trabalho (ILO).

Iha fatin hanesan Presidente CCI-TL Oscar Lima realsa katak, projetu refere uluk kauze atu lakon ona, maibe ho esforsu tomak CCI-TL halo protesta hodi husu fali ba ILO para oinsa bele hala’o fali projetu refere, tanba projetu refere fo benefisiu bo’ot ba komunidade sira iha area rurais.

Oscar Lima hatutan, alende projetu refere fo benefisiu ba komunidade area urbana, fo mos edukasuan ba CCI-TL nia membru atu oinsa bele halo rasik jestaun ba sira nia emprezas, inklui tekniku sira mos konsege aprende buat barak hosi ILO, hodi halo jestaun di’ak hamutuk ho sira nia emprezariu. “Ne’e duni agora projetu ne’e sei hala’o, ba ami senti kontenti tebes, tanba iha tempu badak projetu refere sei lansa hosi Ministru Obras Públiku ho Governu Australia,” dehan Oscar. 

Oscar akresenta projetu refere importante tebes ba Timor-Leste, tanba bele fó edukasaun ba emprezariu ki’ik sira iha area rurais, ne’e duni CCI-TL sei fo apoiu tomak ba projetu refere. Tanba hosi projetu refere iha emprezairus 100 resin maka hetan formasaun hosi ILO maibe hira maka hetan benefisiu hosi projetu refere nia la lembra. (BT)