DÍLI----Relasiona ho politika governu Timor Leste liu husi politika reforma ekonomia ne’ebé governu tau peoridade ba iha setór importante sira hodi dada investor internasional no nasional maibe presiza iha kapasidade finanseiru rasik husi investor.

Tanba setór sira ne’ebé peoridade liu mak hanesan setór tuirsmu, agrikultura, manufaktura, mina no gas, atu investe tenke iha kapital finanseiru hodi hare ba oportunidade refere. Tuir Vice Presidente Bankada Fretilin deputadu Francisco Miranda Branco katak, Durante ne’e governu iha planu ba reforma liu husi setór hirak ne’e maibé investor sira tenke iha kapasidade atu investe iha setór hirak ne’e.

“Lei hatete investor estranjeiru tama iha Timor ne’e obrigatoriu, entaun emprejariu Timor oan merese ba 5% ne’e kiik maibé realidade, investor sira mai ne’e Timor iha kapasidade ka lae atu bele sai asionista ne’ebé nia sujeitu ba 5% tanba investimentu boot tebes no 5% ne’e la’os osan kiik” dehan Vice presidente bankada Fretilin ba BT iha PN (14/03). Tuir vice presidente ne’e katak, emprejariu Timor oan seidauk iha kapasidade finanseiru atu investe.

“Kestaun ne’e konpaña Timor oan sira iha kapasidade finanseiru ka lae maibé dalaruma konpaña boot mai sira mai fo de’it aseonista mutin tanba ita laiha kapasidade” nia hetete. Nia hatete, Setor sira hanesan agrikultura, turismu, manufaktura, mina no gas no buat sira seluk tan ne’e banhira atrai uluk investor nasional sira ne’e di’ak maibé investor sira iha Timor vijionerus katak hanoin dook ona.

“Karik ita investe iha agrikultura hanesan kuda ai hodi produs buat ruma ne’e Timor oan tenke iha ona vizaun atu nune’e sira hetan benefísiu iha tinan rua ka tolu ne’e sira iha ona benefisíu ba longu praju, hakarak investe ho investor sira husi liur ne’e tenke iha ona vizaun oinsa iha futuru bele halo produsaun masa hodi bele hatan ba kestaun eksportasaun” dehan Francisco Branco.

Nia mós apresia ho planu ne’ebé governu halo atu loke investimentu maske TL seidauk iha fasilidade ne’ebé kompletu. “Ita hakarak investor sira mai realidade ita kapasidade maka sei araska se ita halo estudu komparativu ema iha péritu no ema ne’ebé iha professional iha área idak-idak maibé infelismente Timor-Leste seidauk maibé laiha buat ida karik governu iha ona planu ida hodi tau matan ba investor Timor oan sira ne’e di’ak para bele kria parseria ho investor sira mai husi liur” nia afirma.

Deputadu ne’e salienta tan katak, investor sira husi estranjeiru presiza halo esutudu beabilidade hafoin investe. “Ita atu hatete investor mai husi liur mós laos monu de’it ba ita nia situasaun maibé sira mai tenke halo estudu no tetu didi’ak mak sira foin bele investe tanba investor sira ne’e hanesan espekulante ne’ebé fiksu sira lakohi lakon maibé hakarak manan tanba laiha investor ida atu sai autor karidade maibé sira hakarak hetan lukru,” hatete deputadu.

Nia mós sujere ba governu atu hadia kapasidade humanu atu bele jere servisu ho di’ak, “Ita koalia kona-ba kapasidade humanu tenke hadia no ita mós tenke aloka orsamentu iha dezenvolvimentu nune’e Timor oan sira sai preparadu maibé ita koalia kona-ba kapasidade ne’e ita iha prosesu ida ne’ebé mekániku so tuir tempu Maibé kapasidade tenke di’ak atu bele jere servisu ho di’ak” nia sujere.

Membru parlamentu ne’e mós kestiona ho planu governu ne’ebé loke mega projeitu tanba seidauk iha kapasidade humanu atu jere ho di’ak. “Ita harii mega projeitu sira mós tenke iha ema ne’ebé kapasidade hanesan edifisiu ministeriu finansa ne’e ita hare atu halo de’it manutensaun ita tenke gasta osan barak hodi selu ema atu halo entaun ita tenke dezenvolve uluk komersiu, agrikultura, turismu ,kapasita uluk lai ida ne’e para ita identifika ita nia ekonomia hodi bele kaer osan hodi hasa’e kresimentu ekonomia” dehan deputadu.

Entretantu nia afirma, loke uluk investimentu boot sira hanesan hotel sira ne’e se mak atu mai toba depois ita seidauk iha kresimentu ekonomia ne’ebé di’ak. Tanba ita seidauk iha kapasidade ba kaer osan, ne’e oinsa ita halo poupansa tanba ita seidauk iha retornu orsamentu,” tenik nia. (BT)