DÍLI----Jardin Díli laran kontinua hetan estragus husi komunidade ne’ebé la iha konsiensia tanba Lei ne’ebé atu regula fraku ho ida ne’e difisil tebes atu kontrola Jardin hirak ne’ebé sai mós hanesan fatin Turizmu hodi atrai Turista sira.

“Ha’u haree Jardin iha Díli laran komesa a’at ona tanba komunidade balun ne’ebé la iha hanoin mai pinta fali parede sira ne’e, sobu besi no tiru rahun hotu lampu hirak ne’ebé monta antes ne’e, ida ne’e hatudu katak Lei mak fraku atu regula sira,” informa Antonio dos Santos, ba jornalista BT iha Largo Lecidere, Díli (21/02/2019).

Nia aumenta tan katak, oinsa mak komunidade sira atu tauk bainhira Governu la kontrola Jardin hirak ne’e. “Bainhira Governu la monta seguransa hodi kontrola Jardin hirak ne’e mak Jardin hirak ne’e sei hetan estragus loron ba loron tanba ema la tauk atu halo a’at tanba Lei atu regula sira la forte,” dehan nia.

Iha fatin seluk, Josefa Alves, hateten, Timor-Leste ukun-an durante tinan 16 Jardin iha Díli laran kuaze a’at ba nafatin, kompara ho tempu okupasaun Jardin hirak ne’e diak liu. “Ukun-an iha tinan hira nia laran, komesa kria Jardin maibé la diak pior liu a’at ba nafatin kompara ho tempu Indonesia ukun ita Jardin hirak ne’e furak tebes no sidade laran mós I matak, tanba ema monta seguransa hodi kontrola, laos hanesan ita nian ne’ebé monta seguransa hanesan panas-panas tai ayam fali,” koa’lia nia.

Estudante Universidade Nasional Timor Lorosa’e ne’e moos husu ba Governu atu monta lalais Seguransa iha Jardin sira ne’ebé iha Díli laran, hodi nune’e komunidade balun ne’ebé la iha konsiensia bele tauk bainhira atu estraga sasan hirak ne’e.

“Governu presija monta seguransa atu nune’e bele kontrola ema hirak ne’ebé malandru tebes hodi estraga Jardin sira iha Díli laran ne’e, bainhira monta seguransa, ha’u fiar katak, Jardin hirak ne’e sei nafatin kontrola no furak nafatin maske iha tinan naruk nia laran,” sujere nia.

Nia koa’alia tan katak, Bainhira Governu kontrola Jardin hirak iha Díli laran ne’e ho diak, mak sidade Díli sei sai furak liu tan, tanba nasaun atu furak laos de’it ho Dezenvolvimentu ne’ebé boot maibé importante mak nia moos no Jardin hirak ne’e halo furak liu tan. (BT)