DÍLI----Organizasaun Kooperasaun no Dezenvolvimentu Ekonómiku (OECD) Aprezenta Relatóriu Revista Kona-ba roteriu Orsamentu futuru Sustentavél ne’ebé hala’o tiha ona iha tinan kotuk no ida ne’e hanesan kontinuasaun.

“Ohin loron Organizasaun Mundial ne’ebé mai atu halo aktualizasaun informasaun ba Primeiru Ministru relasiona ho revista ne’ebé mak organizasaun ida ne’e Governu konvida iha tinan kotuk hodi halo revista ba ita nia roteriu Orsamentasaun ba futuru sustentavél” dehan, Brigida Soares, Koordenadora Unidade Planeamentu Monitorizasaun avaliasaun Gabinete Primeiru Ministru ba jornalista sira iha Palasiu Governu Díli (11/02/2019).

Nia aumenta tan katak, revista ne’ebé hala’o hela mak hanesan reforma jestaun finanseira ho reforma fiskal. “Entaun husi revista ne’ebé mak halo ba dadauk ne’e autualizasaun halo hela tanba ita hatene katak, iha komisaun rua hanesan reforma jestaun finanseira no mós reforma fiskal sei tau hamutuk” nia informa.

Koordenadora ne’e mós informa katak, sei kria konferensia nasional ida no sei partisipa husi organizasaun internasional sira hodi aprezenta ba Governu iha tempu konferensia ne’e la’o.

“Ho ida ne’e iha dia 15 sei iha konferensia nasionál ida hodi konvida organizasaun Internasionál sira mai hotu mai hodi hola parte iha aprezentasaun ba ita/Governu nia jestór sira iha nivél Sekretariu Jerál no DJ, hodi bele familiariza kontextu liu-liu ba iha fiskal estratejia ne’ebé mak Governu presiza adopta bainhira konferensia ne’e remata”.

“Ida ne’e mak OECD nia Prezensa hodi asegura katak, informasaun sira ne’ebé mak halo tiha ona iha tinan kotuk bele informa fila-fali ba aúdensia hodi ema hotu-hotu bele hatene saida mak ne’e no bele hadia wainhira konferensia ne’e remata atu nune’e bele akomoda informasaun sira iha roteriu ida de’it no la hamosu tan roteriu seluk” tenik nia.

Aleinde ida ne’e nia mós esplika tan kona-ba lalaok reforma fiskal nian iha konferensia ida ne’e, katak, parte dahuluk sei haree liu ba iha Medium Term Expenditure Frameworks ne’ebé durante tinan-tinan halo planu annual.

“Revista husi reforma fiskal nian primeiru mak ita haree liu ba iha Medium Term Expenditure Frameworks ne’ebé liga ho planu kinkinal, entaun durante ne’e tinan-tinan ita hala’o planu anual ne’ebé ita mós presiza planu kinkinal ne’ebé mak bele fasilita ita katak, iha tinan lima tuir mai rezultadu saida mak ita hakarak hetan husi implementasaun programa sira ne’e,” realsa nia.

Entretantu, Konferensia ida ne’e sei realize iha loron 14 to’o 15 no sei partisipa mós husi Ministériu relevante sira no sei realize iha Ministériu Finansas. “Ida ne’e mak sei sai sujestaun I depois fiskal ross ne’ebé servisu sai halo husi Ministériu Finansas ho Ministériu seluk sei halo, no seminariu ida ne’e hala’o iha Ministériu Finansas iha loron 14 to’o 15”nia deklara. (BT)