DÍLI----Realiona ho Dividas Setór privadu nian hamutuk 142 ne’ebé mak iha, Governu Timor-Leste konsege selu tusan setór privadu nian maske sidauk atinji 100%.

Tuir Presidente Camará Comercio no Industria Timor-Leste (CCI-TL) hatete, devidas ne’ebé governu deve ba setór privadu sira liu hosi projetu lubuk ida, iha OJE 2018 governu hahu minimiza, tanba projetu balun governu hahu halo pagamentu ba setór privadu. Maske iha projetu balun governu halo ona pagamentu, maibe projetu barak liu maka governu seidauk selu, tan ne’e espera governu sei selu hotu tusan ne’ebé mak iha.

“Relasiona ho situasaun ida agora, ita seidauk bele hatene, oinsa no bainhira los maka governu atu bele selu devidas ba projetu hirak ne’ebé setór privadu sira halo ona. Ne’e dunik se agora maka governu lao ho orsamentu duadesimu, hau hanoin buat ida ne’e la fasil para governu atu selu.” dehan Oscar ba Jornalista BT iha edifisiu CCI-TL foin lalais ne’e.

Nia esplika katak se makina estadu kontinua lao ho orsamentu duadesimu mak sei la hakotu dividas setór privadu nian tanba Duodesimu atu funsiona deit makina Estadu. Oscar hatutan, konaba montante orsamentu ne’ebé governu selu ona ba projetu setór privadu sira nian, CCI-TL seidauk hatene, tanba seidauk hetan dadus.

Tanba normalmente kuandu governu seidauk selu emprezariu sira sempre mai hato’o kestaun, maibe kuandu governu selu ona emprezariu ida-idak nonok iha sira nia fatin (alias la imforma ba CCI-TL), “Montante orsamentu hira maka governu selu ona ba setór privadu sira i ida ami seidauk hatene, tanba sira la imforma hikas ba ami.

Tanba ne’e konaba levantamentu dadus hodi atu hatene los projetu hira maka governu selu no hira maka seidauk ami seidauk iha dadus”esplika Presidente CCI-TL. Tanba ne’e nia husu ba lideransa sira atu tur hamutuk atu buka solusaun, hodi nune’e bele hakotu lalais impase politik iha rai laran, tanba situasaun ida agora ne’e implika tebes ba povu ki’ik sira nia moris.

Tanba to agora 30% emprezarius maka taka ona sira nia atividade, maibe emprezariu hirak ne’e maioria hosi estrangeirus. Oscar sublinha katak, konaba projetu ne’ebé durante ne’e setór privadu sira halao barak, tanba tuir dadus ne’ebé CCI-TL iha provolta orsamentu hamutuk 400 ital miloens, maibe balun selu ona. (BT)