DÍLI----Situasaun impase politika ne’ebé mak oras ne’e lao iha Timor-Leste fo impaktu ba iha atividade komersiu liu-liu iha setór importasaun tanba hahu husi 2017 to’o agora volume importasaun menus liu-liu material kontrusaun hahu menus maibe Nesesidade baziku kontinua Mantein nia volume.

Tuir Diretór Jerál Alfándega, José António, hatete hahú husi 2017 mai to’o Tinan 2019 volume importasaun menus tanba impaktu husi impase polítka ne’ebé durante ne’e lao iha rai laran.

“Impase Politika hahú husi 2017 nia volume importasaun tun makas mai to’o iha 2018, agora iha 2019 ita foin mak hare reseitas hira mak ita alkansa ona iha Janéiru nia laran, nune’e ita hare maisoumenus balansu to’o tinan ida ne’e ita hetan reseitas hira, tanba ita hare volume importasaun ne’e la hanesan, nia tun sa’e,” Dehan Diretór Jerál Alfándega, José António ba jornalista sira iha salaun Ministériu Finansas Aitarak Laran, Segunda feira (28/01/2019).

Nia hatete, sasan importasaun depende ba iha nesesidade, maibé depende ba ema nia hakarak mós, maibe impase politika halo importador sira barak mak hahu dada an tanba laiha rendimentu. Nia esplika, atividade sasan tama iha portu Dili liu-liu materiál konstruksaun la iha ona, tanba projetu iha rai laran lala’o ho ida ne’e fó impaktu ba sasan hirak ne’ebé atu tama mai mos.

“Klaru ita nia volume importasaun konstruksaun menus, maibé importasaun ne’ebé nia volume mantein ne’e mak nesesidade baziku,” tenik nia. Nia hatete, impase polítika ne’ebé iha afeita mós ba investidores, ema hirak ne’e atu mai mosu duvidas barak, tanba investor sira mai ho objektivu atu hetan benefísiu maibe tanba situasaun impase halo investor sira susar atu mai halo investimentu iha Timor Leste.

Diretór ne’e dehan, impase polítika afeita mós ba reseitas iha Alfándega, tanba iha 2018 Alfándega konsege rekoila de’it reseitas tokon U$ 80 resin, maibé halo komparasaun iha 2017 Alfándega hatama tokon U$75 signifika reseitas iha diferensia boot. “Diferensia ne’e husi situasaun polítika mak kontribui, importadores sira atu hatama sasan mai mós sira hanoin barak, tanba ne’e mak impaktu ba ita nia reseitas tun,” dehan nia.

Tanba ne’e mak Alfándega husu situasaun normalija lalais hodi nune’e volume importasaun komesa aumenta ona nune’e kobre ba reseitas mós barak aumenta tan. Impase Politika ne’ebé akontese kuaze tinan 2 liu ona seidauk hetan solusaun entre lideransa sira hodi fó afeita ba kresimentu ekomonia rai laran, kompañia lubun mak komesa lulun ona biti ho ida ne’e aumenta mós dezenpregu iha rai laran.

Se mak terus ba impase politika ida ne’e, Povo mak sai vitima ba interese husi lideransa sira nian ne’ebé hakarak hadau malu kadeira to’o ikus Povo mak sai vitima, Povo nafatin halerik maibé ulun boot sira nafatin taka tilun no matan. Ho ida ne’e fiar katak tama iha 2019 ida ne’e Lideransa sira hotu bele tur hamutuk hodi buka solusaun husi Impase Politika ne’e hodi nune’e Povo bele moris iha hakmatek nia laran no dezenvolvimentu nasaun mós sei la’o ho diak. (BT)