DÍLI----Governu Timor-Leste liu husi Diresaun Nasional Eletrisidade Timor Leste (EDTL) durante tinan 2018 hahu fulan Janeiru to’o Dezembru konsege hatama reseita hamutuk tokon $15.600 ba kofre estadu.

Tuir Diretor Jeral EDTL Virgilho Guterres hateten, liu husi servisu EDTL nian ba rekollamentu reseita liu husi atividade oin-oin konsege hatama resita hamutuk $15.600. 

“Reseitas sira ne’e, kobre husi prepagu sira iha teritoriu laran tomak, maibé ba fulan Jullu nian mak sedauk tanba ami sei rekonsilia hela, ”dehan Diretór Jeral EDTL Virgilho Guterres ba jornalista sira iha nia knar fatin Caicoli foin lalais ne’e.

Diretór Jeral ne’e hatete, kona-ba funsionamentu faan pulsa prepagu lao di’ak hela tanba EDTL faan de’it iha sentral maibé iha kompañia telekomunikasaun tolu hanesan Timor Telekom, Telemor ho Telekomcel hola ho Cash hafoin sira faan fali ba publiku.

“Ita hareé fatin fa’an pulsa prepagu barak ona iha Dili laran, nuneé mós teritoriu tomak tanba ne’e eletrisidade la preokupa ona,”tenik nia.
Aleinde ne’e nia mós afirma kona-ba iha fatin balun ne’ebé seidauk monta EDTL sei esforsu oinsa bele monta mos tanba to’o agora EDTL konsege monta ona Prepagu hamutuk 11.000 no rihun 50 mak seidauk hetan prepagu no EDTL kontinua esforsu oinsa monta mos ba sira ne’ebé seidauk hetan.

“Agora depende ba orsamentu mezmu halo ona proposta ba iha ne’eba maibé ikus mai la pasa maibé husu boot atu buat hotu la’o ho di’ak nune’e iha tempu badak bele hola fali prepagu para monta ba uma hotu-hotu nune’e labele mosu deskriminasaun. Alende ne’e iha Munisipiu Baucau Prepagu ne’ebé maka oras ne’e EDTL Munisipiu Baucau, instala ona pontador prepagu 10.000 resin ba konsumedores. Ho prepagu nee, komunidade sira bele kontribui ona ba tasa estadu.

Tuir Diretor EDTL Munisipiu Baucau, Paulino A da Costa alende prepagu, durante tinan 2016, sira konsege rejista konsumedores 16 mil resin. Prepagu rihun resin nee, sira instala komesa husi Postu Administrativu Baucau, Vemasse, Laga, no Venilale. No sei iha tan liña eletrisidade foun neebe sei iha projetu nia laran. Tuir planu, EDTL Baucau sei instala prepagu ba uma komunidade hot-hotu ne’ebé asesu EDTL.

Konsumedor balu ate agora seidauk monta prepagu tamba kestaun orsamentu. Maibe sei fiar, iha tempu besik sei instala hotu ba liña foun nebe iha. Maske pesoal EDTL Baucau limitadu maibe parte teknika esforsu lao tuir uma hodi kontrola sira nia liña eletrisidade. Objetivu konrtolasaun nee hodi prevene liga ahi ilegal. Oras nee dadaun tempu udan no anin bot nebe halo eletrisidade avaria iha fatin balun nebe parte tekniku sei ba hare.

Defikuldades nebe hetan durante iha terenu maka pesoal EDTL nebe limitadu, Estrada a'at no presiza trasporte nebe ho kondisaun diak atu bele uja ba iha area hirak nebe luan teb-tebes. Tan ne’e nia mos husu ba konsumedores tomak iha munisipiu Baucau atu proteje liña enerjia eletrisidade atu fo kontribuisaun atu enerjia nebe iha bele funsiona nafatin. (BT)